زردہ

اجزاء: دودھ 2 کپ، چاول (باسمتی) 3 کپ، گھی 4 کھانے کے چمچ، دار چینی ایک ٹکڑا (25 ملی میٹر یا 1انچ)، لونگ 2 عدد، الائچی 7عدد، فوڈ کلر (زردے کا رنگ) چند قطرے، چینی ایک کپ، بادام، پستہ حسب منشا، زعفران حسبِ ضرورت۔

ترکیب: ایک چھوٹے فرائی پین میں زعفران کی تاریں 10 سیکنڈ تک بھونیں۔ پھر اس میں دودھ شامل کر کے ایک طرف رکھ دیں۔ اب چاول صاف کرکے دھوئیں، پھر انہیں پانچ سے دس منٹ کے لیے بھگو دیں۔ بعد میں پانی پسا کر ایک جانب رکھ دیں۔ اب 2کپ پانی ابلنے کے لیے رکھ دیں۔ ایک پریشر ککر میں گھی گرم کریں اور اس میں الائچی،لونگ،دار چینی اور چاول شامل کریں۔ انہیں دس منٹ تک بھونیں، پھر زعفران مکسچر، فوڈ کلر، چینی اور گرم پانی شامل کردیں۔ دو سیٹیوں تک پریشر ککر میں پکائیں۔ ڈھکن کھولنے سے قبل بھاپ خارج کریں۔ کانٹے کی مدد سے چاولوں کا ہر ایک دانہ علیحدہ علیحدہ کریں۔ پھر اسے میوہ جات کے ساتھ گارنش کرکے گرما گرم کھانے کے لیے پیش کریں۔

سویاں

سویاں موٹی پسی ہوئی 2 کپ، دودھ ملائی والا ڈھائی کپ، چینی تین چوتھائی کپ، مکھن 2 سے 3 کھانے کے چمچ، الائچی 10 سے 12 عدد، خشک کھجوریں 6 عدد، خشک میوہ جات تین چوتھائی کپ، نمک ایک چٹکی۔

ترکیب: مکھن کو گرم کرکے اس میں سویاں شامل کریں اور کچھ منٹ کے لیے ہلکی آنچ پر انہیں تل لیں۔ اب سوئیوں کو فرائنگ پین سے نکال کر الگ کر لیں۔ اسی پین میں خشک میوہ جات، کھجوریں اور الائچیاں تلیں۔ پھر دودھ، چینی اور نمک شامل کریں اور اس وقت تک پکائیں جب تک دودھ خشک نہیں ہوجاتا۔ سوئیوں کو گرما گرم یا ٹھنڈا کر کے پیش کریں۔

گاجر کا حلوہ

اجزاء: گاجر 2کلو، دودھ 6 کپ، چینی 4 کپ، چھوٹی الائچی 10 عدد، بادام 15عدد، پستے 15 عدد، اخروٹ کی گریاں 12 دانے، چاندی کے ورق 6 عدد، دیسی گھی دو پیالی۔

ترکیب: گاجر کو باریک کدو کش کر لیں اور بادام کو گرم پانی میں بگھو کر چھلکے اتار لیں۔ اب باداموں اور اخروٹ کو باریک باریک کاٹ لیں اور الائچی کو دو چمچ چینی کے ساتھ باریک پیس لیں۔ کدو کش کی ہوئی گاجروں کو ایک پتیلے میں ڈال کر ہلکی آنچ پر پکنے کیلئے رکھ دیں، گاجروں کو اتنا پکائیں کے ان میں سے پانی خشک ہو جائے۔ اس کے بعد ایک پتیلی میں گھی ڈال کر گرم کریں اور پھر اس میں الائچی ڈال دیں۔ تھوڑی دیر بعد گاجریں اور دودھ ڈال کر ہلکی آنچ پر آہستہ آہستہ بھونیں۔ گاجریں جب براؤن ہونا شروع ہو جائیں تو چینی اور اخروٹ ڈال دیں۔ انہیں مزید بھونیں اور جب شیرا خشک یا گاڑھا ہونے لگے تو چولہے سے حلوہ اتار لیں۔ اب ایک پیالے میں حلوہ ڈال کر اسے میوہ جات اور چاندی کے ورق سے سجا دیں۔

ربڑی

اجزاء: دودھ (بالائی کے ساتھ) 2 لیٹر، چینی 3سے 4کپ، عرق گلاب 1 چائے کا چمچ، بادام، پستہ (باریک کٹے ہوئے)۔ حسب ذائقہ

ترکیب: ایک دیگچی میں دودھ ڈال کر اسے ابال دیں اور پھر آنچ ہلکی کر دیں۔ تھوڑی تھوڑی دیر میں ملائی کی تہہ کو دیگچی کے کناروں کی طرف لاتے رہیں تاکہ کناروں کے ساتھ ایک دائرہ سا بن جائے۔ جب دودھ پک کر ایک چوتھائی رہ جائے تو اس میں چینی وپستہ بادام ڈال دیں۔ اب اس کو اتنی دیر پکائیں کہ دودھ بالکل خشک ہو جائے اور ربڑی ملائی باقی رہ جائے پھر عرق گلاب ملا کر فریج میں رکھ کر ٹھنڈا کرلیں بس ربڑی تیار ہے۔