مکیش امبانی کو دھمکی دینے والا لڑکا گرفتار

ممبئی، 4نومبر :(اردودنیانیوز.کام/ایجنسیز) مکیش امبانی کو دھمکی آمیز ای میل بھیجنے پر تلنگانہ سے ایک لڑکے کو گرفتار کیا گیا ہے۔ مہاراشٹر کی گام دیوی پولیس نے بتایا کہ ملزم کی شناخت 19 سالہ گنیش رمیش وانپاردھی کے طور پر کی گئی ہے۔ اسے گرفتار کرکے عدالت میں پیش کیا گیا اور 8 نومبر تک پولیس کی تحویل میں بھیج دیا گیا۔ مکیش امبانی کو 27 اکتوبر سے یکم نومبر تک جان سے مارنے کی دھمکیوں پر مشتمل پانچ ای میل بھیجے گئے تھے۔اس میں 400 کروڑ روپے کا مطالبہ کیا گیا تھا۔پولیس نے کہا تھا کہ تمام دھمکیاں ایک ہی میل آئی ڈی سے موصول ہوئی تھیں۔ امبانی کو 27 اکتوبر کو پہلا دھمکی آمیز میل موصول ہوا۔ اس میں 20 کروڑ روپے کا مطالبہ کیا گیا تھا۔ اگلے دن 28 اکتوبر کو ایک اور میل موصول ہوئی۔ اس میں رقم بڑھا کر 200 کروڑ روپے کر دی گئی۔ پھر 30 اکتوبر کو بھی ایک میل آیا، جس میں 400 کروڑ روپے کا مطالبہ کیا گیا تھا۔

میل میں کہا گیا کہ اگر رقم نہ ملی تو اسے ملک کے بہترین شوٹرز کے ہاتھوں قتل کر دیا جائے گا۔ 27 اکتوبر کو پہلی میل موصول ہونے کے بعد، گامدیوی پولیس نے آئی پی سی کی دفعہ 387 اور 506 (2) کے تحت ایک نامعلوم شخص کے خلاف ایف آئی آر درج کرکے تحقیقات شروع کی۔ اس سے پہلے بھی امبانی اور ان کے خاندان کو کئی بار جان سے مارنے کی دھمکیاں مل چکی ہیں۔اسی وجہ سے گزشتہ سال 29 ستمبر کو مرکزی وزارت داخلہ نے ان کی سیکورٹی کو زیڈ زمرہ سے بڑھا کر زیڈ پلس کر دیا تھا۔ مکیش امبانی سیکورٹی کے اخراجات ادا کرتے ہیں۔ یہ خرچہ 40 سے 45 لاکھ روپے ماہانہ ہے۔