سب رنگ ٹرسٹ معاملہ:تیستا سیتل واڑ اور ان کے شوہر کو  عدالت عظمیٰ سے ملی راحت، ضمانت برقرار

 نئی دہلی، یکم نومبر:(اردودنیانیوز.کام/ایجنسیز) این جی او (سبرنگ ٹرسٹ) فنڈ میں گڑبڑی معاملے پر سماجی کارکن تیستا سیتل واڑ اور ان کے شوہر جاوید آنند کو سپریم کورٹ سے بڑی راحت ملی ہے۔ عدالت عظمیٰ پیشگی ضمانت سے متعلق گجرات ہائی کورٹ کے فیصلے میں مداخلت سے انکار کر دیا ہے۔ یعنی سیتل واڑ اور ان کے شوہر کی پیشگی ضمانت برقرار رہے گی۔سپریم کورٹ نے تیستا سیتل واڑ اور ان کے شوہر جاوید آنند کو دولت کے مبینہ طور پر غلط استعمال کو لے کر ان کیخلاف داخل معاملے میں گجرات پولیس کے ساتھ تعاون کرنے کی ہدایت دی۔ ایڈیشنل سالیسٹر جنرل ایس وی راجو کے یہ کہنے کے بعد کہ دونوں جانچ میں تعاون نہیں کر رہے ہیں، جسٹس ایس کے کول کی صدارت والی تین ججوں کی بنچ نے حکم پاس کیا ہے۔

جسٹس سدھانشو دھولیا اور جسٹس پی کے مشرا کی بنچ نے مذکورہ معاملہ میں پیشگی ضمانت دینے کو چیلنج کرنے والی گجرات حکومت کی عرضی کا نمٹارا کرتے ہوئے کہا کہ ابھی تک فرد جرم داخل نہیں کیا گیا ہے۔ اے ایس جی کا ماننا ہے کہ تعاون کی کمی ہے۔ جیسا بھی ہو، جواب دہندہ ضرورت پڑنے پر جانچ میں تعاون کریں گے۔عدالت عظمیٰ نے سیتل واڑ کی اس عرضی کا بھی نمٹارا کر دیا جس میں گجرات ہائی کورٹ کے ذریعہ 8 فروری 2019 کے فیصلے میں پیشگی ضمانت دیتے وقت کیے گئے تبصرے کو ہٹانے کا مطالبہ کیا گیا تھا۔ بنچ نے ان کی پیشگی ضمانت کو مکمل بناتے ہوئے کہا کہ یہ کہنا غلط ہے کہ ضمانت کے مرحلہ میں کیا گیا کوئی بھی تبصرہ معاملے کی سماعت پر شاید ہی کوئی اثر ڈال سکتا ہے۔ ہمیں اس سے زیادہ کچھ کہنے کی ضرورت نہیں ہے۔