تیج پرتاپ یادو کی سات ماہ بعد لالو پرساد یادو سے ملاقات

نئی دہلی :(اردودنیا.اِن/ایجنسیز)دہلی میں سیاست اور خاندانی تعلقات ایک بار پھر موضوعِ بحث بن گئے، جب تیج پرتاپ یادو نے تقریباً سات ماہ کے وقفے کے بعد اپنے والد اور راشٹریہ جنتا دل کے بانی لالو پرساد یادو سے ملاقات کی۔ یہ ملاقات انوشکا یادو معاملے کے بعد پہلی بار ہوئی، جسے بہار کی سیاست میں خاص اہمیت دی جا رہی ہے۔

یہ ملاقات دہلی میں میسا بھارتی کی رہائش گاہ پر اس وقت ہوئی، جب نوکری کے بدلے زمین کیس میں راؤس ایونیو کورٹ میں پیشی کے بعد تیج پرتاپ یادو وہاں پہنچے۔ انہوں نے اپنے والد سے آشیرواد حاصل کیا اور مکر سنکرانتی کے موقع پر دہی چوڑا کی دعوت میں شرکت کی درخواست کی۔

عدالتی کارروائی کے دوران تیج پرتاپ یادو اور تیجسوی یادو ایک ہی وقت میں عدالت میں موجود تھے، تاہم دونوں بھائیوں کے درمیان کوئی بات چیت نہیں ہوئی۔ بعد ازاں تیجسوی یادو میسا بھارتی کے گھر گئے، جبکہ کچھ دیر بعد تیج پرتاپ یادو بھی وہیں پہنچے، لیکن اس وقت تک تیجسوی وہاں سے روانہ ہو چکے تھے۔

میڈیا سے گفتگو کرتے ہوئے تیج پرتاپ یادو نے کہا کہ انہوں نے اپنے والد سے ملاقات کی، آشیرواد لیا اور انہیں دہی چوڑا دعوت میں مدعو کیا ہے۔ ان کا کہنا تھا کہ انہیں پورا یقین ہے کہ لالو پرساد یادو اس تقریب میں ضرور شرکت کریں گے۔

نوکری کے بدلے زمین کیس پر بات کرتے ہوئے تیج پرتاپ یادو نے کہا کہ وہ اس قانونی لڑائی کا سامنا کریں گے اور سچائی کے ساتھ عدالت میں اپنا موقف رکھیں گے۔ واضح رہے کہ سی بی آئی نے اس معاملے میں انہیں بھی ملزم نامزد کیا ہے۔

سیاسی حلقوں میں اس ملاقات کو محض خاندانی نہیں بلکہ سیاسی اعتبار سے بھی اہم قرار دیا جا رہا ہے، کیونکہ آنے والے دنوں میں بہار کی سیاست میں اس کے اثرات دیکھے جا سکتے ہیں۔