تلنگانہ میں ووٹر لسٹ کی خصوصی نظرثانی کا آغاز، شہریت کے ثبوت لازمی قرار
الیکشن کمیشن نے شہریوں سے اپیل کی ہے کہ وہ اپنی تفصیلات کی بروقت تصدیق کریں
حیدرآباد:ریاست تلنگانہ کے تمام 119 اسمبلی حلقوں کے لیے تیار کردہ ووٹر لسٹ (Electoral Roll) چیف الیکشن آفیسر کے دفتر نے جاری کردی ہے۔ یہ فہرست الیکشن کمیشن کی آفیشل ویب سائٹ ceotelangana.nic.in پر دستیاب ہے، جس سے شہری اپنے یا اپنے والدین کے نام درج ہونے کی جانچ آسانی سے کرسکتے ہیں۔
الیکشن کمیشن نے رائے دہندوں کو موقع فراہم کیا ہے کہ وہ SIR 2002 فہرست میں اپنے نام، والدین کے نام یا دیگر تفصیلات کی تصدیق کرسکیں۔ اسمبلی حلقہ اور پولنگ اسٹیشن نمبر کی بنیاد پر ووٹرز کے لیے تفصیلات تلاش کرنا اب نہایت آسان ہوگیا ہے۔
الیکشن کمیشن کے مطابق، اگر کسی ووٹر کا نام یا والدین کا نام SIR 2002 میں موجود ہے تو نئے SIR میں کسی اضافی دستاویز کی ضرورت نہیں ہوگی۔ تاہم، جن کے نام درج نہیں ہیں انہیں تاریخِ پیدائش اور شہریت سے متعلق ثبوت لازمی طور پر جمع کرانے ہوں گے۔
الیکشن کمیشن نے ووٹرس کو تین زمروں میں تقسیم کیا ہے:
1️⃣ یکم جولائی 1987 سے پہلے پیدا ہونے والے افراد کو اپنی تاریخِ پیدائش ثابت کرنے والی دستاویز دینی ہوگی۔
2️⃣ یکم جولائی 1987 سے 2 دسمبر 2004 کے درمیان پیدا ہونے والوں کو اپنے والدین (ماں یا باپ) کی تاریخ اور جائے پیدائش کی تصدیق پیش کرنا ہوگی۔
3️⃣ 2 دسمبر 2004 کے بعد پیدا ہونے والوں کو اپنے والدین کی تاریخ پیدائش اور جائے پیدائش کے ثبوت لازمی طور پر دینا ہوں گے۔
سپریم کورٹ کے احکامات کے مطابق، ہر ووٹر کو یہ بھی ثابت کرنا ہوگا کہ اسے کسی دوسرے ملک کی شہریت حاصل نہیں ہے۔
الیکشن کمیشن نے شہریت اور شناخت کی تصدیق کے لیے 11 اقسام کی دستاویزات تسلیم کی ہیں، جن میں شامل ہیں:
-
پیدائش کا سرٹیفکیٹ
-
10ویں جماعت یا دیگر تعلیمی اسناد
-
پاسپورٹ
-
سرکاری ادارے، بینک، پوسٹ آفس یا مقامی حکومت کی جانب سے جاری کردہ شناختی کارڈ
-
مستقل رہائش کا سرٹیفکیٹ
-
OBC/SC/ST ذات کا تصدیقی سرٹیفکیٹ
-
نیشنل رجسٹرار آف سینسس کی تفصیلات
-
فیملی رجسٹر
-
زمین یا مکان الاٹمنٹ سے متعلق سرکاری دستاویزات
یہ تمام دستاویزات شہریت، رہائش اور خاندانی شناخت کے باضابطہ ثبوت کے طور پر استعمال کی جاسکیں گی۔
الیکشن کمیشن نے شہریوں سے اپیل کی ہے کہ وہ اپنی تفصیلات کی بروقت تصدیق کریں تاکہ آئندہ انتخابات میں کسی بھی دشواری یا ووٹر لسٹ سے نام خارج ہونے کے خطرے سے بچا جاسکے۔
🌍 تازہ ترین خبریں، اپڈیٹس اور دلچسپ معلومات حاصل کریں!
🔗 اردو دنیا نیوز واٹس ایپ گروپ: https://whatsapp.com/channel/0029Vak6CXMBqbrGx1IZGA16
