ٹیکساس کے شاپنگ سنٹر پارکنگ لاٹ میں فائرنگ، تین افراد ہلاک

آسٹن، 12 اگست :(اردودنیا.اِن/ایجنسیز)امریکی ریاست ٹیکساس کے شہر آسٹن میں ایک شاپنگ سنٹر کے پارکنگ لاٹ میں فائرنگ کے واقعے میں تین افراد ہلاک ہو گئے ہیں جبکہ مشتبہ شخص کو گرفتار کر لیا گیا ہے۔

پولیس چیف لیزا ڈیوس نے بتایا کہ ملزم موقع سے فرار ہوا، ایک گاڑی چرا کر تباہ کی اور پھر دوسری گاڑی پر قبضہ کر لیا۔ فائرنگ میں ایک بالغ اور ایک بچہ موقع پر ہلاک ہوئے، جبکہ ایک اور بالغ اسپتال میں زخموں کی تاب نہ لاتے ہوئے چل بسا۔

آسٹن-ٹریوس کانٹی ایمرجنسی سروسز کے مطابق ایک شخص کو معمولی زخم آئے جو اس واقعے سے براہِ راست متعلق نہیں تھے، اور ایک اور فرد کو جسمانی چوٹ کے بجائے طبی مسئلے کے باعث علاج فراہم کیا گیا۔

پولیس چیف نے ہلاک شدگان کے اہل خانہ سے تعزیت کرتے ہوئے کہا کہ یہ آسٹن کے لیے نہایت افسوسناک دن ہے۔ انہوں نے مزید کہا کہ مقتولین کی شناخت فی الحال جاری نہیں کی گئی۔

یہ واقعہ تعلیمی سال کے آغاز سے قبل خریداری کے سیزن میں پیش آیا، اور اس سے چند روز قبل میشی گن کے شہر ٹریورس سٹی میں بھی ایک پرتشدد واقعہ پیش آ چکا ہے، جہاں ایک شخص پر "وول مارٹ” اسٹور میں 11 افراد کو چاقو مارنے کا الزام ہے۔ اس پر دہشت گردی اور متعدد قتل کی کوششوں کے الزامات عائد کیے گئے ہیں۔