تھائی لینڈ میں ٹرین حادثہ: تعمیراتی کرین گرنے سے کم از کم 30 افراد ہلاک
ایک بڑی کرین اچانک چلتی ہوئی مسافر ٹرین پر گر گئی۔
بنکاک 14.جنوری :(اردودنیا.اِن/ایجنسیز) تھائی لینڈ کے شمال مشرقی صوبے نخون رتچاسیما میں بدھ کے روز ایک دل دہلا دینے والا حادثہ پیش آیا، جہاں ایک زیر تعمیر ریلوے منصوبے کی تعمیر کے دوران ایک بڑی کرین اچانک چلتی ہوئی مسافر ٹرین پر گر گئی۔ اس خوفناک حادثے کے نتیجے میں کم از کم 30 افراد ہلاک جبکہ درجنوں مسافر شدید زخمی ہو گئے۔
حکام کے مطابق یہ ٹرین دارالحکومت بنکاک سے صوبہ اوبون رتچاتھانی کی جانب جا رہی تھی کہ اچانک بلند ریلوے ٹریک پر کام کے دوران کرین توازن کھو بیٹھی اور براہِ راست ٹرین پر آ گری۔ ٹکر کے فوراً بعد ٹرین کی کئی بوگیاں پٹری سے اتر گئیں اور آگ بھڑک اٹھی، جس سے نقصان کی شدت میں مزید اضافہ ہوا۔
صوبے کے گورنر کے مطابق ٹرین میں موجود تقریباً 171 مسافروں میں سے چار تاحال لاپتہ ہیں، جبکہ ریسکیو ٹیمیں حادثے کے کئی گھنٹے بعد تک ملبے میں تلاش کا کام کرتی رہیں۔ جائے حادثہ سے آنے والی تصاویر اور ویڈیوز میں دیکھا جا سکتا ہے کہ الٹی ہوئی بوگیوں میں بڑے شگاف پڑ چکے ہیں اور کرین کے ٹوٹے ہوئے حصے پٹری کے ساتھ بکھرے ہوئے ہیں۔
یہ حادثہ ایک بڑے تھائی۔چینی ہائی اسپیڈ ریلوے منصوبے کے تحت زیر تعمیر بلند ریلوے حصے پر پیش آیا، جس کا مقصد تھائی لینڈ کو ہمسایہ ممالک کے ذریعے چین سے جوڑنا ہے۔ اس منصوبے پر اربوں بات کی لاگت آ رہی ہے اور اسے خطے میں سفری اور تجارتی روابط کے لیے انتہائی اہم سمجھا جا رہا ہے۔
وزیرِ ٹرانسپورٹ نے واقعے کی فوری تحقیقات کا حکم دیتے ہوئے کہا ہے کہ ذمہ دار عناصر کے خلاف سخت قانونی کارروائی کی جائے گی۔ حکام نے عندیہ دیا ہے کہ ٹھیکیدار کمپنی اور منصوبے کی نگرانی کرنے والے اداروں کی ذمہ داریوں کا تفصیلی جائزہ لیا جائے گا۔
یہ پہلا موقع نہیں کہ اس منصوبے کے دوران حادثہ پیش آیا ہو۔ اس سے قبل بھی اسی روٹ پر ایک سرنگ کے منہدم ہونے سے مزدور ہلاک ہو چکے ہیں، جس کے بعد حفاظتی انتظامات پر سوالات اٹھائے گئے تھے۔ حالیہ حادثے کے بعد عوامی غصہ مزید بڑھ گیا ہے اور بڑے تعمیراتی منصوبوں میں معیار اور نگرانی کے نظام پر شدید تنقید کی جا رہی ہے۔
چینی حکام نے بھی حادثے پر افسوس کا اظہار کرتے ہوئے کہا ہے کہ وہ صورتحال پر نظر رکھے ہوئے ہیں اور تحقیقات کے نتائج کا انتظار کیا جا رہا ہے۔ متاثرہ خاندانوں کے لیے معاوضے اور زخمیوں کے علاج کے اخراجات ادا کرنے کا اعلان بھی کیا گیا ہے۔
#BREAKING: Dozens of people were killed and injured when a construction crane lifting a section of a bridge collapsed onto a passenger train in Sikhio, Thailand.pic.twitter.com/Ff7ioMReJG
— OSINT Spectator (@osint1117) January 14, 2026
