جھارکھنڈ کے سابق سی ایم ہیمنت سورین کو کوئی راحت نہیں، ای ڈی کی حراست میں تین دن کی توسیع

نئی دہلی :(اردودنیانیوز.کام/ایجنسیز)عدالت نے جھارکھنڈ کے سابق وزیر اعلیٰ ہیمنت سورین کو تین دن کے لیے ای ڈی کی حراست میں بھیج دیا ہے۔ پی ایم ایل اے کے خصوصی جج راجیو رنجن نے ہیمنت سورین کو تین دن کے لیے ای ڈی ریمانڈ پر بھیج دیا ہے۔ زمین گھوٹالے کے معاملے میں سابق وزیر اعلی کی گرفتاری کے بعد، انفورسمنٹ ڈائریکٹوریٹ کی خصوصی عدالت نے ای ڈی کو دو بار ان کا ریمانڈ دیا تھا۔ اس دوران انفورسمنٹ ڈائریکٹوریٹ کی ٹیم کو ہیمنت سورین سے پوچھ گچھ کے لیے 5-5 دن کا وقت دیا گیا۔

دوسری طرف سابق وزیر اعلیٰ ہیمنت سورین کی گرفتاری کو چیلنج کرنے والی عرضی پر جھارکھنڈ ہائی کورٹ میں سماعت کے دوران ای ڈی سے اپنا جواب داخل کرنے کے لیے وقت دینے کی اپیل کی گئی ہے۔ عدالت نے ای ڈی کے اس مطالبے کو قبول کرلیا ہے۔

اب عدالت نے کیس کی اگلی سماعت اور حتمی نمٹانے کے لیے 27 فروری کی تاریخ مقرر کی ہے۔ اس سے پہلے، 5 فروری کو، اس عرضی پر سماعت کرتے ہوئے، ہائی کورٹ کے قائم مقام چیف جسٹس ایس چندر شیکھر اور جسٹس انوبھا راوت چودھری کی بنچ نے ای ڈی سے 9 فروری تک اپنا جواب داخل کرنے کو کہا تھا۔ سورین نے اپنی عرضی میں کہا ہے کہ ای ڈی کے پاس انکے خلاف جھوٹے الزامات کے تحت مقدمہ درج کیا گیا ہے گرفتاری کے پیچھے کوئی ٹھوس بنیاد نہیں ہے۔ زمین گھوٹالے میں تقریباً آٹھ گھنٹے کی پوچھ گچھ کے بعد ایجنسی نے 31 جنوری کو سورین کو گرفتار کیا تھا۔ فی الحال وہ ایجنسی کے ریمانڈ پر ہیں اور ان سے پوچھ گچھ جاری ہے۔