یورپ و ایشیاء کو ملانے والا دریا نہرِ سوئز کا اولین منصوبہ حضرت عمرؓ کا تھا✍️ظفر سید

پچھلے برس سوئز میں پھنسنے والے بحری جہاز کی وجہ سے اس نہر پر دنیا بھر کی توجہ مرکوز ہوئی ہے لیکن کیا آپ جانتے ہیں کہ اس نہر کا اولین منصوبہ کیسے تیار ہوا اور پھر ترک کر دیا گیا؟نہرِ سوئز کی تعمیر میں 15 لاکھ سے زیادہ مزدوروں نے حصہ لیا۔ پچھلے برس سوئز میں پھنس جانے والے دیوقامت بحری جہاز کی وجہ سے روزانہ دنیا کو 9 ارب ڈالر سے زیادہ نقصان ہو رہا تھا اور جہاز نکل جانے کی صورت میں بھی بننے والا بدترین ٹریفک جام کئی ہفتوں بعد جا کر صاف ہوا۔اس خبر کے بعد سے دنیا کی توجہ نہرِ سوئز کی طرف مبذول ہوئی ہے، لیکن کم ہی لوگ جانتے ہیں کہ اس نہر کا اولین منصوبہ  حضرت عمر فاروق رضی اللہ عنہ کے دور میں تیار ہوا تھا، لیکن بوجوہ اس پر عمل نہیں ہوسکا، جس کی تفصیل نیچے آ رہی ہے۔

نہر کھدوانے کی ضرورت کیوں پیش آئی؟

اس کی تفصیل مولانا شبلی نعمانی اپنی مشہور کتاب ’الفاروق‘ میں بیان کرتے ہیں۔ انہوں نے لکھا ہے: ’اس کی مختصر تاریخ یہ ہے کہ 18 ہجری کو جب تمام عرب میں قحط پڑا تو حضرت عمر فاروق رضی اللہ عنہ   نے تمام اضلاع کے حکام کو لکھا کہ ہر جگہ کثرت کے ساتھ غلہ اور اناج روانہ کیا جائے۔ اگرچہ اس حکم کی فوری تعمیل ہوئی، لیکن شام اور مصر سے خشکی کا جو راستہ تھا بہت دور دراز تھا، اس لئے غلہ بھیجنے میں پھر بھی دیر لگی۔ حضرت عمر فاروق t نے ان تمام دقتوں پر خیال کر کے عمر بن العاص t (گورنر مصر) کو لکھا کہ مصر کے باشندوں کی ایک جماعت ساتھ لے کر دارالخلافہ حاضر ہو۔’جب وہ آئے تو فرمایا کہ ’دریائے نیل کو اگر سمندر سے ملا دیا جائے تو عرب کو قحط گرانی کا کبھی اندیشہ نہیں ہو گا، ورنہ خشکی سے غلہ آنا دقت سے خالی نہیں۔‘

حضرت عمر بن العاص رضی اللہ عنہ نے واپس جا کر کام شروع کر دیا اور فسطاط سے (جو قاہرہ سے 10، 12 میل ہے) بحرِ قلزم تک نہر تیار کرائی۔ اس ذریعہ سے جہاز دریائے نیل سے چل کر قلزم میں آتے تھے اور یہاں سے جدہ پہنچ کر لنگر کرتے جو مدینہ منورہ کی بندرگاہ تھی۔یہ نہر تقریباً 69 میل لمبی تھی اور تعجب ہے کہ چھ مہینے میں بن کر تیار ہوگئی، چنانچہ پہلے ہی سال 20 بڑے بڑے جہاز جن میں ساٹھ ہزار اردب غلہ بھرا تھا اس نہر کے ذریعہ سے مدینہ منورہ کی بندرگاہ میں آئے۔ یہ نہر مدتوں تک جاری رہی اور اس کے ذریعے سے مصر کی تجارت کو نہایت ترقی ہوئی۔؎

حضرت عمرو بن العاص رضی اللہ عنہ کو تامل تھا کہ یہ منصوبہ کامیاب نہیں ہو سکتا ہے، لیکن جب انہوں نے دیکھا کہ  حضرت عمر فاروق رضی اللہ عنہ اس بارے میں بہت سنجیدہ ہیں تو انہوں نہر کھدوانے کی تیاری شروع کر دی۔تاریخ دان عبدالحکم کے مطابق ایک قبطی مصری نے انہیں وہ قدیم رومی گزرگاہ دکھائی جو اب ریت سے اٹ چکی تھی۔ اس کے عوض حضرت عمرو بن العاص t نے اس قبطی اور اس کے خاندان کا جزیہ معاف کر دیا۔شبلی نعمانی لکھتے ہیں کہ حیرت انگیز طور پر یہ نہر صرف چھ ماہ میں تیار ہو گئی، جس سے اس خیال کو تقویت ملتی ہے کہ نئی نہر نہیں کھودی گئی بلکہ صدیوں پرانی رومی نہر کی صفائی کر کے اسے بحال کر دیا گیا۔نہر جب تیار ہوئی تو حضرت عمرو بن العاص t نے بھی اس پر سفر کیا۔ اس نہر کو نہرِ امیر المومنین کا نام دیا گیا۔

فاطمی دور کے تاریخ دان ابن تویر لکھتے ہیں کہ اس نہر میں چوڑے پیندے والی کشتیوں کو پانچ دن لگتے ہیں جب کہ اونٹوں پر یہی فاصلہ سات یا آٹھ دن میں طے ہوتا ہے۔ دوسرا فائدہ یہ تھا کہ صرف ایک کشتی پر اونٹوں کے ایک چھوٹے قافلے جتنا سامان لادا جاسکتا تھا۔اس زمانے میں مصر کو مشرقِ وسطیٰ کا کھلیان سمجھا جاتا تھا۔ اب اس کا براہِ راست رابطہ مسلمانوں کے دارالخلافہ سے ہو گیا، جس کی وجہ سے یہاں قحط آنے کا خطرہ ختم ہو گیا۔

نہرِ سوئز کا منصوبہ جسے ترک کردیا گیا

مولانا شبلی کے مطابق حضرت عمرو بن العاص رع نے صرف اسی نہر پر اکتفا نہیں کی بلکہ انہوں نے بحیرۂ احمر کو بحیرۂ روم سے ملانے کا ارادہ کیا تھا۔ وہ لکھتے ہیں: چنانچہ اس کے لئے موقع اور جگہ کی تجویز بھی کرلی تھی، اور چاہا تھا کہ فرما کے پاس سے جہاں سے بحرِ روم اور بحرِ قلزم کا فاصلہ صرف 70 میل رہ جاتا ہے، نہر نکال کر دونوں دریاؤں کو ملا دیا جائے۔ لیکن جب حضرت عمر کو ان کے ارادے کی اطلاع ہوئی تو اجازت نہ دی اور لکھ بھیجا کہ اگر ایسا ہوا تو یونانی جہازوں میں آ کر حاجیوں کو نقصان پہونچائیں گے۔ اگر عمرو بن العاص کو اجازت ملی ہوتی تو نہرِ سوئز کی ایجاد کا فخر درحقیقت عرب کے حصے میں آتا۔ اس دور میں حاجیوں کے قافلوں پر حملے بہت عام تھے، اس لئے خدشہ تھا کہ نہر کی تیاری سے دشمنوں کو سہولت ملے گی۔

نہرِ سوئز پر تو کام شروع نہ ہوسکا، البتہ نہر امیر المومنین 114 سال تک چلتی رہی۔ 754 میں عباسی خلیفہ کے خلاف مکہ اور مدینہ میں بغاوت ہوئی اور خلیفہ المنصور نے مکہ مدینہ کو خوراک کی فراہمی بند کرنے کے لئے اس نہر کو پاٹ دینے کا حکم جاری کر دیا۔18ویں صدی میں یورپی تاریخ دان بیرن دے توت نے اس نہر کے آثار ڈھونڈ نکالے اور کہا کہ معمولی مرمت سے یہ نہر دوبارہ بحال کروائی جا سکتی ہے۔ تاہم 20ویں صدی میں بڑے پیمانے پر شہری اور زرعی ترقی سے اس نہر کے آثار مٹ گئے۔

قدیم زمانے کے منصوبے: لیکن حضرت عمر  وہ پہلے حکمران نہیں ہیں جنہیں نیل سے بحیرۂ احمر تک نہر نکلوانے کا خیال آیا ہو۔بحیرۂ احمر کو دریائے نیل سے ملانے کا منصوبہ سب سے پہلے فرعونوں کے زمانے میں تیار ہوا تھا۔ روایت ہے کہ 1890 قبل مسیح کے آس پاس حکومت کرنے والے فرعون سینوسرت ثانی نے اس نہر کی کھدائی شروع کروائی تھی، تاکہ نیل سے بحیرۂ احمر تک کشتیوں کے ذریعے نقل و حمل کی جاسکے۔ تاریخ دان پلنی کے مطابق اس نہر کی لمبائی 60 میل تھی۔

بعد میں دارا اول اور بطلیموس نے بھی اس پرانی نہر کا احیا کرنے کی کوششیں کی۔ یونانی تاریخ دان ہیروڈوٹس نے لکھا ہے کہ ایک اور مصری حکمران نخاو الثانی نے بھی اسی قسم کی نہر کھدوانے کی کوشش کی مگر ایک لاکھ 20 ہزار مزدوروں کی جانیں گنوانے کے بعد اسے یہ منصوبہ ادھورا ہی چھوڑنا پڑا۔بعد میں ایرانی شہنشاہ دارا اول نے یہ منصوبہ مکمل کروایا جس میں ہیروڈوٹس کے مطابق دو کشتیاں ساتھ ساتھ چل سکتی تھیں۔

دارا کے کندہ کروائے ایک کتبے پر لکھا ہے: شاہ دارا: میں ایرانی ہوں۔ میں نے فارس سے نکل کر مصر فتح کیا۔ میں نے نیل کہلائے جانے والے دریا سے نہر کھدوانے کا حکم دیا تاکہ اسے فارس سے شروع ہونے والے سمندر سے ملایا جاسکے۔ جب میرے حکم کے بموجب نہر کھود دی گئی تو جہاز فارس سے اس نہر کی مدد سے مصر جانے لگے۔لیکن صحرائی علاقے میں اس نوعیت کے تعمیراتی منصوبوں کے ساتھ یہ مسئلہ ہوتا ہے ہوا چلنے کے ساتھ ریت اڑ اڑ کر ان میں پڑتی رہتی ہے۔ چنانچہ کچھ ہی عرصے بعد نہر کے آثار تک مٹ جاتے تھے۔ یہی وجہ ہے کہ اسلامی دور کے آتے آتے یہ نہر معدوم ہوچکی تھی۔جدید نہرِ سوئر اور نہر امیر المومنین۔ دونوں میں خاصا علاقہ مشترکہ بھی ہے جو بحیرۃ المرہ نامی ایک جھیل سے ہو کر گزرتا ہے۔

جدید نہرِ سوئز جسے فرانسیسیوں نے تیار کیا: جدید نہرِ سوئز کا منصوبہ 19ویں صدی کے وسط میں فرانسیسی سفارت کار فرڈیننڈ دے لیسپ نے تیار کیا تھا۔ یہ منصوبہ نہر امیر المومنین یا قدیم رومی یا مصری نہروں سے مختلف تھا کیوں کہ اس میں بحیرۂ احمر کو دریائے نیل سے نہیں، بلکہ براہِ راست بحیرۂ روم سے ملانے کی تجویز تھی۔ دے لیسپ نے یہ منصوبہ اس زمانے کے مصری خدیو سعید پاشا کے سامنے پیش کیا جنہوں نے اجازت دی اور نہر کھودنے کے لئے سوئز کینال کمپنی قائم کردی گئی۔

برطانیہ چونکہ فرانس کا حریف تھا اس لئے اس نے اس منصوبے پر ناک بھوں چڑھائی۔ ایک تو وہ فرانس کو فائدہ پہنچتا نہیں دیکھ سکتے تھے دوسرا یہ اس وقت بحرِ ہند سے یورپ کی تجارت براستہ جنوبی افریقہ سے ہوتی تھی جس پر برطانیہ کا کنٹرول تھا۔تاہم اس مخالفت کے باوجود 25 اپریل 1859 کو کام شروع ہوگیا اور دس برس کے عرصے اور 15 لاکھ کے قریب مزدوروں کی مشقت کے بعد یہ عظیم منصوبہ مکمل ہوا۔اس نہر میں ’ایور گیون‘ کے اٹک جانے سے رپورٹوں کے مطابق روزانہ نو ارب ڈالر کا نقصان ہو رہا تھا۔ اس کا مطلب یہ ہے کہ اس کا فائدہ نو ارب ڈالر روزانہ ہے۔ اب سوچئے کہ پچھلے 153 سالوں میں اس نہر سے دنیا کو کتنا فائدہ پہنچا ہے؟