قومی خبریں
ایس آئی ٹی تحقیقات کی نگرانی کرنے والے جج نے کہا-وزیر کے بیٹے کی ضمانت کو چیلنج کرے یوپی حکومت
نئی دہلی،30؍مارچ:(اردودنیا.اِن/ایجنسیاں)سی جے آئی این وی رمنا، جسٹس سوریہ کانت اور جسٹس ہیما کوہلی کی خصوصی بنچ نے لکھیم پور کھیری تشدد کیس میں مرکزی وزیر مملکت برائے داخلہ کے بیٹے آشیش مشرا کی ضمانت کو چیلنج کرنے والی درخواست پر سماعت کی۔ سماعت کے دوران جسٹس سوریا کانت نے یوپی حکومت سے پوچھا کہ ایس آئی ٹی نے یوپی کے سکریٹری کو دو خط بھیجے ہیں۔
ایس آئی ٹی نے ضمانت منسوخ کرنے کی سفارش کی۔ اس پر آپ کا کیا موقف ہے؟
49 دن گزرنے کے بعد بھی یوپی حکومت آشیش مشرا کی ضمانت کو چیلنج کرنے پر فیصلہ نہیں کر پائی ہے۔ اب سپریم کورٹ نے یوپی حکومت کو پانچ دن کا وقت دیا ہے۔ سپریم کورٹ نے یوپی حکومت سے کہا ہے کہ وہ ایس آئی ٹی کی نگرانی کرنے والے ریٹائرڈ جج کے خط پر اپنا موقف واضح کرے۔
اسی وقت یوپی حکومت کی جانب سے پیش ہوئے مہیش جیٹھ ملانی نے عدالت کو بتایا کہ یوپی حکومت کے سکریٹری کہہ رہے ہیں کہ انہیں کوئی خط نہیں ملا ہے۔ جس پر سی جے آئی نے کہا کہ وہ رپورٹ ریاست اور درخواست گزار کو دیں گے۔دراصل ایس آئی ٹی کی نگرانی کرنے والے ہائی کورٹ کے ریٹائرڈ جج نے آشیش مشرا کی ضمانت منسوخ کرنے کی اپیل کرنے کی سفارش کی ہے۔ جج نے یوپی حکومت کو خط لکھا ہے۔
سپریم کورٹ نے خط پر یوپی حکومت سے جواب طلب کیا ہے۔ یوپی حکومت کو پیر تک جواب دینا ہوگا۔ اس معاملے پر اگلی سماعت پیر کو ہوگی۔ سپریم کورٹ نے پنجاب اور ہائی کورٹ کے ریٹائرڈ جج جسٹس راکیش کمار جین سے کہا ہے کہ وہ خط ریاستی حکومت اور درخواست گزار کو پہنچا دیں۔
