نئی دہلی،25مئی :(اردودنیا.اِن/ایجنسیاں)نیشنل انوسٹی گیشن ایجنسی (این آئی اے) نے بدھ کے روز کشمیری علیحدگی پسند رہنما یاسین ملک کو دہشت گردی کی مبینہ مالی معاونت کے معاملہ میں سزائے موت دینے پر زور دیا ہے۔ عدالتی ذرائع نے ا س کی اطلاع دی ہے۔ یاسین ملک نے اپنے خلاف تمام الزامات کو قبول کر لیا تھا۔ جب کہ یاسین ملک کی مدد کے لیے عدالت کی طرف سے مقرر کردہ ایک دوست نے درخواست کی کہ اسے اس کیس میں کم سے کم سزا یعنی عمر قید کی سزا سنائی جائے۔
اس دوران یاسین ملک نے جج سے کہا کہ وہ اپنی سزا کا فیصلہ عدالت پر چھوڑ رہے ہیں۔عدالت نے دلائل سننے کے بعد فیصلہ محفوظ کر لیا ہے ۔عدالت نے 19 مئی کو کالعدم تنظیم جموں و کشمیر لبریشن فرنٹ (جے کے ایل ایف) کے سربراہ یاسین ملک کو غیر قانونی سرگرمیوں کی روک تھام ایکٹ (یو اے پی اے) کے تحت مجرم قرار دیا تھا۔ انہوں نے این آئی اے حکام کو ہدایت دی تھی کہ وہ یاسین ملک کی مالی حالت کا جائزہ لیں، تاکہ ان پر جرمانہ عائد کیا جا سکے۔یاسین ملک نے عدالت کو بتایا تھا کہ وہ اپنے اوپر لگائے گئے الزامات کی مخالفت نہیں کرتے۔
الزامات میں UAPA کی دفعہ 16 (دہشت گردانہ کارروائیاں)، 17 (دہشت گردانہ کارروائیوں کے لیے فنڈز اکٹھا کرنا)، 18 (دہشت گردانہ کارروائیوں کی سازش) اور 20 (دہشت گرد گروہ یا تنظیم کا رکن ہونا) اور تعزیرات ہند کی 120-B شامل ہیں۔ عدالت نے اس سے قبل فاروق احمد ڈار عرف بٹا کراٹے، شبیر شاہ، مسرت عالم، محمد یوسف شاہ، آفتاب احمد شاہ، الطاف احمد شاہ، نعیم خان، محمد اکبر کھانڈے، راجہ معراج الدین کلوال، بشیر احمد بٹ، ظہور احمد شاہ وتالی، شبیر احمد شاہ، عبدالرشید شیخ اور نیول کشور کپور سمیت کشمیری علیحدگی پسند رہنماؤں کے خلاف باقاعدہ طور پر الزامات عائد کیے گئے تھے۔لشکر طیبہ کے بانی حافظ سعید اور حزب المجاہدین کے سربراہ سید صلاح الدین کیخلاف بھی چارج شیٹ داخل کی گئی تھی، جنہیں اس کیس میں مفرور مجرموں کے طور پر نامزد کیا گیا ہے۔
