بوہرہ برادری کے رہنما ڈاکٹر مفضل سیف الدین جامعہ ملیہ اسلامیہ کے نئے چانسلر مقرر

نئی دہلی :(اردودنیانیوز.کام/ایجنسیز) داؤدی بوہرہ برادری کے مذہبی رہنما ڈاکٹر سیدنا مفضل سیف الدین کو جامعہ ملیہ اسلامیہ کا چانسلر مقرر کیا گیا ہے۔ پیر کو جامعہ کورٹ کے اجلاس میں چانسلر کی خالی آسامی کے لیے ڈاکٹر مفضل سیف الدین کا نام تجویز کیا گیا جسے تمام اراکین نے متفقہ طور پر منظور کرلیا۔ ڈاکٹر مفضل سیف الدین جامعہ کی سابق چانسلر ڈاکٹر نجمہ۔نجمہ ہبت اللہ کی جگہ اگلے پانچ سال تک یونیورسٹی کے چانسلر کے طور پر خدمات انجام دیں گے۔ جامعہ کی چانسلر کے طور پر ڈاکٹر۔نجمہ ہبت اللہ کی مدت ملازمت 2022 میں پوری ہوئی۔ اس کے بعد سے چانسلر کا عہدہ خالی تھا۔

وائس چانسلر پروفیسر نجمہ اختر نے داؤدی بوہرہ برادری کے مذہبی رہنما ڈاکٹر مفضل سیف الدین کو یونیورسٹی کا چانسلر بننے پر مبارکباد دی ہے۔ انہوں نے کہا کہ ان کی تعلیمات اور رہنمائی سے یونیورسٹی آگے بڑھے گی۔یونیورسٹی کے ایک سینئر اہلکار کے مطابق ڈاکٹر مفضل سیف الدین کے تقریباً دس لاکھ داؤدی بوہرہ پیروکار ہیں۔ داؤدی بوہرہ برادری اسلام کی اسماعیلی شیعہ شاخ کا ایک ذیلی گروپ ہے۔ انہوں نے بہت سے ثقافتی، سماجی اور اقتصادی شعبوں میں کام کیا ہے۔ انہوں نے بنیادی طور پر بچوں کو تعلیم تک مساوی رسائی فراہم کرنے پر کام کیا ہے۔ اس میں زرعی نظام کا تعارف، مقامی انفراسٹرکچر میں بہتری بھی شامل ہے۔

پیر کو ہونے والی جامعہ کورٹ میٹنگ میں 45 میں سے 44 ممبران موجود تھے۔ اس میں تین ارکان پارلیمنٹ بھی شامل تھے۔ جبکہ دیگر ممبران میں جامعہ ا سکول اینڈ سنٹر کے تمام ڈینز، 10 شعبہ جات کے سربراہان اور دیگر سینئر پروفیسرز اور ممبران شامل تھے۔ وائس چانسلر پروفیسر نجمہ اختر نے جامعہ چانسلر کی خالی آسامی کے لیے ڈاکٹر مفضل سیف الدین کا نام تجویز کیا تھا۔ تمام اراکین نے بغیر کسی مشکل کے اس تجویز کو متفقہ طور پر منظور کر لیا۔

سیدنا مفضل سیف الدین داؤدی کا تعلق بوہرہ برادری سے ہے۔ 53ویں الداعی المطلق، ڈاکٹر سیدنا مفضل سیف الدین 2014 سے داؤدی بوہرہ مسلم کمیونٹی کے سربراہ ہیں۔ سیدنا مفضل سیف الدین کو کئی باوقار اعزازات سے نوازا گیا ہے۔ وہ 500 بااثر مسلمانوں کی فہرست میں شامل تھے۔

حال ہی میں پی ایم مودی سے ملاقات کی۔ان کا استقبال کئی ممالک میں ایک اعزازی سرکاری مہمان کے طور پر کیا جاتا ہے۔ 10 فروری کو، پی ایم مودی نے داؤدی بوہرہ کمیونٹی کی الجامعہ السیفیہ عربی اکیڈمی کے ممبئی کیمپس کا افتتاح کیا۔ اس دوران انہوں نے روحانی پیشوا سیدنا مفضل سیف الدین سے ملاقات کی۔پی ایم مودی نے داؤدی بوہرہ برادری کے پروگرام سے خطاب کرتے ہوئے سیدنا مفضل سیف الدین کی تعریف کی تھی۔ وزیر اعظم نے کہا تھا کہ وہ سیدنا صاحب کے خاندان کی چار نسلوں کو جانتے ہیں۔ میں یہاں وزیر اعظم کے طور پر نہیں بلکہ فیملی ممبر کے طور پر آیا ہوں۔