مگرمچھ کے جبڑوں سے خاتون کرشماتی طور پر بچ گئی

جکارتہ:(اردودنیانیوز.کام/ایجنسیز) انڈونیشیا میں ایک خاتون مگرمچھ کے جبڑوں میں 90 منٹ تک پھنسے رہنے کے باوجود کرشماتی طور محفوظ رہیں۔ بتایا جاتا ہے کہ 27 جولائی کو انڈونیشیا کے کلیمانٹان صوبہ میں پام آئل کی شجر کاری میں کام کرنے والی 38 سالہ فلمیرا ڈی جیسزFalmira De Jesus جب کیٹا پانگ ریجنسی میں واقع پتوں اور جھاڑیوں سے ڈھکی ندی کی کم گہری جگہ سے پانی لینے گئی تو کائی اور سبزے کے نیچے پہلے سے موجود ایک بڑے مگر مچھ نے اچانک اس پر حملہ کیا اور اس کی ٹانگ پکڑ کر اسے پانی کے اندر گھسیٹنے لگا۔

فلمیرا نے بڑی جدوجہد کرکے نہ صرف خود کو پانی میں جانے سے روکا بلکہ چلا کر اپنے ساتھی کارکنوں کو اپنی مدد کیلئے پکارا۔ اس دوران باہمت ساتھی ورکرز نے پانی میں ڈنڈے پھینک کر مگرمچھ کو بھاگنے پر مجبور کیا۔ دریں اثنا خاتون نے بتایا کہ جس جگہ سے مگر مچھ نے مجھے پکڑ رکھا تھا وہاں مجھے شدید تکلیف ہورہی تھی اور میں خود کو چھڑا نہیں پارہی تھی اور مجھے ایسا محسوس ہونے لگا کہ میں کمزور پڑ رہی ہوں اور مرنے والی ہوں کیونکہ میں پانی کے اندر جاتی جارہی تھی۔