امریکی شہر سان فرانسسکو میں خالصتان کیلئے ووٹنگ، ہزاروں سکھ جمع

سان فرانسسکو، 29جنوری:(اردودنیانیوز.کام/ایجنسیز) امریکی شہر سان فرانسسکو میں ہندوستان مخالف خالصتان ریفرنڈم میں اپنا ووٹ کاسٹ کرنے کیلئے ہزاروں سکھوں کا جم غفیر پولنگ اسٹیشن کے باہر پہنچ گیا، ووٹنگ کا سلسلہ 8 گھنٹے تک جاری رہے گا۔سان فرانسسکو کے سوک سینٹر میں جاری ووٹنگ میں بین الاقوامی آبزرور بھی موجود ہیں۔ریفرنڈم کیلئے سکھ رہنما گرپتونت سنگھ ہائی لیول سکیورٹی میں سوک سینٹر پہنچے، سکھ رہنماؤں کا کہنا تھا کہ ہم اپنے لیے الگ وطن کا مطالبہ کرتے ہیں اور بھارت سے آزادی چاہتے ہیں۔سکھ رہنما کا الزام تھا کہ بھارت میں سکھوں کیلئے دھرتی تنگ اور ان کی مبینہ نسل کشی کی جا رہی ہے۔

سکھ فار جسٹس کے شریک بانی بخشیش سنگھ سندھو کا الزام تھا کہ ہزاروں کی تعداد میں سکھوں کو بھارت سے اپنی خودمختاری، آزادی اور خالصتان کے قیام کیلئے کیلئے یہاں جمع ہوئے دیکھ کر خوشی ہو رہی ہے۔انہوں نے کہا کہ یہ ہزاروں سکھ جو آج یہاں جمع ہیں سب بھارت کے پنجاب پر ناجائز قبضے سے آزادی کا مطالبہ کر رہے ہیں۔خیال رہے کہ ہندوستان نے خالصتان کو ملک مخالفت کے باعث دہشت گرد قرار دے کر خالصتان تحریک پر پابندی لگادی ہے۔