12 اگست 2026 کو دنیا بھر میں نظر آئے گا نایاب مکمل سورج گرہن، یورپ میں خاص جوش و خروش
گرہن 12 اگست کی رات تقریباً 9 بج کر 4 منٹ پر شروع ہوگا
واشنگٹن 06 مئی:(اردودنیا.اِن/ایجنسیز) دنیا بھر کے فلکیات کے شوقین افراد 12 اگست 2026 کو ہونے والے مکمل سورج گرہن کا بے صبری سے انتظار کر رہے ہیں۔ اس روز چاند سورج کو مکمل طور پر ڈھانپ لے گا اور دن کے وقت کئی علاقوں میں اندھیرا چھا جائے گا۔ یہ نایاب منظر تقریباً 2 منٹ اور 18 سیکنڈ تک برقرار رہے گا۔
ماہرین کے مطابق چاند کا گہرا سایہ گرین لینڈ کے آرکٹک علاقوں، آئس لینڈ کے آتش فشانی خطوں اور اسپین کے وسیع میدانوں سے گزرے گا۔ ان علاقوں میں مکمل سورج گرہن واضح طور پر دیکھا جا سکے گا، جبکہ دنیا کے کئی دیگر حصوں میں جزوی گرہن دکھائی دے سکتا ہے۔
ہندوستان میں یہ مکمل سورج گرہن نظر نہیں آئے گا کیونکہ اس وقت یہاں رات ہوگی۔ اسی وجہ سے سوتک کا دور بھی لاگو نہیں ہوگا۔ ہندوستانی معیاری وقت کے مطابق گرہن 12 اگست کی رات تقریباً 9 بج کر 4 منٹ پر شروع ہوگا اور 13 اگست کی صبح تقریباً 4 بج کر 25 منٹ تک جاری رہے گا۔
فلکیاتی معلومات کے مطابق مشرقی گرین لینڈ میں مکمل گرہن مقامی وقت کے مطابق شام تقریباً 4 بج کر 30 منٹ پر شروع ہوگا۔ اس کے بعد یہ سایہ آئس لینڈ پہنچے گا جہاں مکمل گرہن شام 5 بج کر 45 منٹ سے 5 بج کر 48 منٹ کے درمیان دکھائی دے گا۔ اسپین میں یہ منظر غروبِ آفتاب سے کچھ پہلے تقریباً 8 بج کر 25 منٹ کے بعد دیکھا جائے گا۔
سورج گرہن کئی گھنٹوں تک جاری رہتا ہے، تاہم اس کا سب سے حیرت انگیز مرحلہ صرف چند منٹوں پر مشتمل ہوتا ہے۔ ابتدا میں چاند سورج کے ایک حصے کو ڈھانپتا ہوا دکھائی دیتا ہے۔ جیسے جیسے سورج کا بڑا حصہ چھپنے لگتا ہے، دن کی روشنی مدھم ہو جاتی ہے، درجہ حرارت میں کمی محسوس ہوتی ہے اور سائے نمایاں نظر آنے لگتے ہیں۔
مکمل سورج گرہن کے دوران آسمان تاریک ہو جاتا ہے اور بعض مقامات پر ستارے بھی دکھائی دینے لگتے ہیں۔ یہی وجہ ہے کہ دنیا بھر کے سیاح، سائنس دان اور فوٹوگرافر اس نایاب منظر کو دیکھنے کے لیے خصوصی تیاری کر رہے ہیں۔
ماہرین نے بتایا کہ 1999 کے بعد یہ پہلا موقع ہوگا جب یورپ میں مکمل سورج گرہن دیکھا جائے گا۔ آئس لینڈ میں 1954 کے بعد جبکہ اسپین میں 1905 کے بعد ایسا نایاب منظر دکھائی دے گا۔
سائنس دانوں کے مطابق مکمل سورج گرہن کو محفوظ طریقے سے دیکھنے کے لیے خصوصی حفاظتی چشموں کا استعمال ضروری ہے۔ بغیر حفاظت کے سورج کو دیکھنا آنکھوں کے لیے نقصان دہ ثابت ہو سکتا ہے۔
