ٹرینوں میں کھانے پینے کی اشیا فروخت کرنے والوں کے لیے کیو آر کوڈ والا شناختی کارڈ لازمی

نئی دہلی 11 جون:(اردودنیا.اِن/ایجنسیز)بھارتی ریلوے نے ٹرینوں میں مسافروں کی حفاظت، صحت اور سفری سہولتوں کو بہتر بنانے کے مقصد سے غیر مجاز کھانے پینے کی اشیا فروخت کرنے والوں کے خلاف سخت کارروائی شروع کرنے کا فیصلہ کیا ہے۔ نئی ہدایات کے مطابق اب صرف وہی افراد ٹرینوں میں اشیا فروخت کر سکیں گے جن کے پاس کیو آر کوڈ سے مزین سرکاری شناختی کارڈ موجود ہوگا۔

ریلوے حکام کے مطابق بغیر مجاز شناختی کارڈ کے ٹرینوں میں گھوم کر اشیا فروخت کرنے والوں کے خلاف فوری کارروائی کی جائے گی۔ اس مقصد کے لیے ٹکٹ چیکنگ عملے کو بھی خصوصی ہدایات دی گئی ہیں۔ اگر کسی ٹرین میں کوئی غیر مجاز شخص سامان فروخت کرتا نظر آئے تو متعلقہ اہلکار فوراً کنٹرول روم اور ریلوے پروٹیکشن فورس کو اطلاع دیں گے۔ اطلاع ملتے ہی اگلے اسٹیشن پر موجود ریلوے پروٹیکشن فورس کی ٹیم کارروائی کرتے ہوئے ایسے افراد کو حراست میں لے گی۔

ریلوے ذرائع کا کہنا ہے کہ غیر قانونی طور پر اشیا فروخت کرنے والوں کا مسئلہ برسوں سے موجود ہے۔ متعدد شکایات کے باوجود یہ عناصر مختلف مواقع پر کارروائی سے بچ نکلتے تھے۔ اب پہلی بار ٹکٹ چیکنگ عملے اور ریلوے پروٹیکشن فورس کے درمیان براہ راست رابطے کے ذریعے اس مسئلے پر مؤثر انداز میں قابو پانے کی کوشش کی جا رہی ہے۔

کوٹہ ریلوے ڈویژن کے سینئر ڈپٹی کمرشل منیجر سوربھ جین نے کہا کہ بغیر مجاز شناختی کارڈ کے کسی بھی شخص کو ٹرینوں میں کھانے پینے کی اشیا فروخت کرنے کی اجازت نہیں دی جائے گی۔ ان کا کہنا تھا کہ اس اقدام کا مقصد مسافروں کو محفوظ اور معیاری خدمات فراہم کرنا ہے۔

ریلوے کے مطابق اس فیصلے سے مسافروں کو کئی فوائد حاصل ہوں گے۔ مجاز فروشوں کی جانب سے فروخت کی جانے والی اشیا کے معیار پر بہتر نگرانی ممکن ہوگی، جس سے غیر معیاری خوراک کے استعمال سے پیدا ہونے والے صحت کے خطرات میں کمی آئے گی۔ اس کے علاوہ ٹرین کی بوگیوں میں غیر شناخت شدہ افراد کی آمد و رفت محدود ہونے سے چوری اور دیگر جرائم کے امکانات بھی کم ہوں گے۔ مسافروں کو بار بار آوازیں لگا کر سامان فروخت کرنے والوں کی وجہ سے ہونے والی پریشانی سے بھی بڑی حد تک نجات ملے گی۔

بھارتی ریلوے نے مسافروں سے تعاون کی اپیل کرتے ہوئے کہا ہے کہ اگر سفر کے دوران کوئی ایسا شخص سامان فروخت کرتا نظر آئے جس کے پاس کیو آر کوڈ والا مجاز شناختی کارڈ موجود نہ ہو تو فوری طور پر ڈیوٹی پر موجود ٹی ٹی ای یا ریلوے پروٹیکشن فورس کے اہلکار کو اطلاع دی جائے۔ مسافر ریل مدد ہیلپ لائن نمبر 139 پر کال یا پیغام کے ذریعے بھی اپنی شکایت درج کرا سکتے ہیں۔

ریلوے حکام کا کہنا ہے کہ مسافروں کو محفوظ، صاف ستھرا اور قابل اعتماد سفر فراہم کرنا ادارے کی اولین ترجیح ہے، اسی مقصد کے تحت غیر مجاز فروخت کنندگان کے خلاف نگرانی اور کارروائی مزید سخت کی جا رہی ہے۔