ادھو ٹھاکرے کی نتن گڈکری کو کھلی پیشکش، آپ بی جے پی چھوڑدیں

ممبئی ،8مارچ:(اردودنیانیوز.کام/ایجنسیز) مرکزی وزیر نتن گڈکری کا نام بی جے پی کی پہلی فہرست میں شامل نہیں ہے۔ اس کو لے کر ادھو گروپ نے کئی بار اپنے بیانات کے ذریعے بی جے پی کو نشانہ بنایا ہے۔ دریں اثنا، شیو سینا (یو بی ٹی) کے صدر کا ایک ویڈیو سامنے آیا ہے جس میں وہ نتن گڈکری کو کھلی پیشکش کرتے ہوئے نظر آ رہے ہیں۔ادھو ٹھاکرے نے دھاراشیو میں منعقد ایک پروگرام میں کہا،‘نتن جی، بی جے پی چھوڑ دیں،استعفیٰ دیں، ساتھ کھڑے ہوں۔ہم آپ کو مہاوکاس اگھاڑی سے جتائیں گے۔بی جے پی کو مزید تنبیہ کرتے ہوئے ٹھاکرے نے کہا، مہاراشٹرا کبھی بھی دہلی کے سامنے نہیں جھکا۔ یہاں تک کہ چھترپتی شیواجی مہاراج بھی آگرہ میں اورنگ زیب کے سامنے نہیں جھکے۔شیوسینا (یو بی ٹی) کے صدر ادھو ٹھاکرے نے حال ہی میں آنے والے لوک سبھا انتخابات کے لیے بی جے پی کی 195 امیدواروں کی پہلی فہرست سے مرکزی وزیر نتن گڈکری کو خارج کرنے پر حیرت کا اظہار کیا ہے۔ ناگپور لوک سبھا سیٹ سے دو بار رکن پارلیمنٹ رہنے والے نتن گڈکری 2014 سے ہندوستانی سیاست کی ایک اہم شخصیت ہیں۔

بی جے پی اور وزیر اعظم نریندر مودی پر حملہ کرتے ہوئے، ادھو ٹھاکرے نے کہاکہ اپوزیشن پارٹیوں کو ختم کرنے کی سیاست کو برداشت نہیں کیا جائے گا۔جملہ(فرضی وعدے) کا نام بدل کر گارنٹی ہونا چاہیے۔ادھو ٹھاکرے کا یہ تبصرہ ایسے وقت میں آیا ہے جب این ڈی اے میں سیٹوں کی تقسیم کو لے کر غور و خوض جاری ہے۔ مہاراشٹر کی 48 لوک سبھا سیٹوں کے لیے مہاوتی سے سیٹوں کی تقسیم کے بارے میں ابھی تک کوئی واضح تصویر نہیں ہے۔آج مہاراشٹر کے وزیر اعلیٰ ایکناتھ شندے،نائب وزیر اعلیٰ دیویندر فڑنویس، اجیت پوار، راجیہ سبھا کے ممبر پارلیمنٹ پرفل پٹیل سمیت کئی لیڈر امت شاہ کے ساتھ مہاراشٹر پر تبادلہ خیال کریں گے۔ ایسے میں آئندہ لوک سبھا انتخابات اور سیٹوں کی تقسیم کو لے کر کیا بات چیت ہوتی ہے یہ تو میٹنگ کے بعد ہی پتہ چلے گا۔