آدھار ایڈریس اپڈیٹ: بغیر ثبوت کے آدھار میں پتہ تبدیل کرنا آسان، UIDAI کا نیا اصول جاری

نئی دہلی 06 مئی:(اردودنیا.اِن ڈیسک) آدھار کارڈ کو موجودہ دور میں سب سے اہم دستاویزات میں شمار کیا جاتا ہے، کیونکہ بینکاری خدمات، سرکاری اسکیموں اور مختلف ضروری کاموں میں اس کا استعمال لازمی سمجھا جاتا ہے۔ ایسے میں مکان تبدیل کرنے کے بعد آدھار میں پتہ درست کرانا اکثر لوگوں کے لیے ایک مشکل مرحلہ بن جاتا تھا۔

اب بھارتی شناختی ادارہ یو آئی ڈی اے آئی نے آدھار رکھنے والوں کو بڑی راحت فراہم کرتے ہوئے ایڈریس اپڈیٹ کے عمل کو پہلے کے مقابلے میں زیادہ آسان بنا دیا ہے۔ نئے اصول کے مطابق اب بعض صورتوں میں بغیر روایتی پتے کے ثبوت کے بھی آدھار میں نیا پتہ درج کیا جا سکتا ہے۔

اس سے قبل آدھار میں پتہ تبدیل کرنے کے لیے بجلی کا بل، کرایہ نامہ یا دیگر سرکاری دستاویزات جمع کرانا ضروری تھا۔ تاہم اب “خاندان کے سربراہ” سہولت متعارف کرائی گئی ہے، جس کے تحت خاندان کے کسی فرد کی رضامندی کی بنیاد پر پتہ اپڈیٹ کیا جا سکتا ہے۔

اس سہولت کے تحت والد، والدہ، شوہر یا بیوی کے آدھار میں درج پتہ استعمال کیا جا سکتا ہے۔ یہ طریقہ خاص طور پر ان افراد کے لیے مفید قرار دیا جا رہا ہے جو کرایہ کے مکان میں رہتے ہیں یا جن کے نام پر کوئی سرکاری پتے کی دستاویز موجود نہیں ہوتی۔

آدھار میں پتہ اپڈیٹ کرنے کے لیے سب سے پہلے آدھار ایپ میں داخل ہونا ہوگا۔ اس کے بعد خدمات والے حصے میں جا کر پتہ اپڈیٹ کا انتخاب کرنا ہوگا۔ پھر خاندان کے رکن کے آدھار کے ذریعے پتہ تبدیل کرنے کی سہولت منتخب کی جائے گی۔

اس عمل کے دوران موبائل نمبر پر موصول ہونے والے otp کی تصدیق، خاندان کے سربراہ کا آدھار نمبر درج کرنا، تعلق کی وضاحت، خود تصدیق اور چہرے کی شناخت مکمل کرنا ضروری ہوگا۔ درخواست مکمل ہونے کے بعد 75 روپے فیس آن لائن جمع کرانی ہوگی۔

درخواست جمع ہونے کے بعد ایک نمبر جاری کیا جائے گا، جسے خاندان کے سربراہ کے ساتھ شیئر کرنا ہوگا۔ متعلقہ فرد اپنی آدھار ایپ میں جا کر درخواست کی منظوری دے گا، جس کے بعد نیا پتہ آدھار کارڈ میں اپڈیٹ ہو جائے گا۔