یوپی میں آسمانی بجلی گرنے سے 18 ہلاک، کئی سنگین زخمی

لکھنؤ، 7جولائی :(اردودنیانیوز.کام/ایجنسیز)یوپی کے کئی اضلاع میں گزشتہ جمعرات کو موسلادھار بارش ہوئی۔ اس دوران مختلف مقامات پر آسمانی بجلی گرنے سے 18 افراد جاں بحق جبکہ درجنوں زخمی ہوگئے۔ آسمانی بجلی گرنے سے کئی مویشی بھی مر گئے۔ حکومت کی طرف سے تمام مرنے والوں کے لواحقین کو قدرتی آفت کے تحت معاوضہ دینے کی ہدایات دی گئی ہیں۔ اتر پردیش کے رائے بریلی میں آسمانی بجلی نے تباہی مچا دی۔ یہاں کے مختلف علاقوں میں آسمانی بجلی گرنے سے تین افراد جاں بحق جبکہ نصف درجن افراد جھلس گئے۔ تحصیل صدر کے علاقہ مل ایریا تھانہ میں ایک ادھیڑ عمر شخص جاں بحق ہوگیا۔ دوسرا واقعہ تھانہ بھدوکھر کے علاقے سرائے دامو کی ہے جہاں آسمانی بجلی گرنے سے ایک خاتون کی موت ہوگئی۔متوفی دیگر خواتین کے ساتھ کھیت میں دھان کی فصل بو رہا تھا۔

تیسرا واقعہ تحصیل سلون کے ڈیہہ تھانے کے تحت گاؤں گویرہ میں پیش آیا۔ گاؤں کے رہنے والے 16 سالہ کشور موہت کی آسمانی بجلی گرنے سے موت ہو گئی۔ موہت مویشی چرا رہا تھا۔ اس دوران آسمانی بجلی گرنے سے ایک گائے کی بھی موت ہو گئی۔ آسمانی بجلی گرنے سے 3 افراد کی موت ہو گئی، جبکہ بھدوکھر تھانہ علاقے کے جگدیش پور گاؤں میں آسمانی بجلی گرنے سے 3 افراد شدید طور پر جھلس گئے، جنہیں مقامی لوگوں اور رشتہ داروں نے ضلع اسپتال میں داخل کرایا، جہاں ان کا علاج کیا جا رہا ہے۔ جس میں 2 خواتین کی حالت تشویشناک بتائی جا رہی ہے۔

دوسری طرف مہوبہ ضلع میں بھی موسلادھار بارش کے درمیان آسمانی بجلی کا تباہی دیکھنے میں آیا۔ کھیت میں کام کرنے والی خاتون کی موت ہو گئی جبکہ میاں بیوی سمیت 7 دیہاتی شدید جھلس گئے۔ آسمانی بجلی گرنے سے 70 بکریاں، ایک بھینس سمیت 80 مویشی موقع پر ہی جاں بحق ہو گئے، مہوبہ میں تین تحصیل بلکھی، سوپا اور تیلی پہاڑی میں آسمانی بجلی گرنے کا واقعہ پیش آیا۔پریاگ راج میں بدھ کے روز آسمانی بجلی گرنے سے کئی اموات ہوئیں۔ پریاگ راج ضلع میں آسمانی بجلی گرنے سے 3 کی موت ہوگئی، جبکہ ایک جھلس گیا۔

کوشامبی ضلع میں بھی آسمانی بجلی گرنے سے ایک بچے کی موت ہو گئی۔ گنگاپار کے ہنڈیا تھانہ علاقے کے بھوئی گاؤں میں 12 سالہ بچی کاجل کی موت ہوگئی، جبکہ 8 سالہ چھوٹا بھائی اتل جھلس گیا۔ ہنڈیا تھانہ علاقہ میں آراواں گاؤں کے 65 سالہ رام جی کی آسمانی بجلی گرنے سے موت ہو گئی۔ بدھ کی شام 5:00 بجے بھینسیں چراتے ہوئے آسمانی بجلی گر گئی۔یمنا پار کے جسرا میں تاتار گنج کے رہنے والے 50 سالہ نول سنگھ کی بھی موت ہوگئی۔ وہ کھیت میں باڑ باندھتے ہوئے آسمانی بجلی کی زد میں آ گئے۔ کوشامبی کے پپری تھانہ علاقے کے بڈان گاؤں میں 12 سالہ پنکج کی بھی موت ہوگئی۔ واقعہ کے وقت پنکج مویشی چرانے کے بعد گھر لوٹ رہا تھا۔

جھانسی ضلع میں بھی کئی مقامات پر آسمانی بجلی گرنے کی خبریں موصول ہوئی ہیں، جس کی وجہ سے ایک خاتون کی موت ہو گئی، جب کہ دو کسان شدید زخمی ہو گئے۔ آسمانی بجلی گرنے سے 20 مویشی بھی مر گئے۔ ایٹا ضلع میں آسمانی بجلی گرنے سے ایک نوجوان کی موت ہو گئی۔ بدایوں ضلع میں بھی آسمانی بجلی گرنے سے 3 افراد کی موت ہو گئی۔ موٹر سائیکل پر جا رہے دو نوجوان اور سکول سے واپس آنے والی چھٹی کلاس کی لڑکی کی موت ہو گئی۔ ایودھیا ضلع میں آسمانی بجلی گرنے سے ایک خاتون کسان کی موت ہو گئی۔ واقعہ کے وقت خاتون کھیت میں دھان لگا رہی تھی۔