نئی دہلی ، 19جولائی:(اردودنیانیوز.کام/ایجنسیز)یونین پبلک سروس کمیشن (UPSC) نے جمعہ کو آئی اے ایس ٹرینی آفیسر پوجا کھیڈکر کی امیدواری کی منسوخی کے لیے نوٹس جاری کیا ہے۔ جاری کردہ ایک میڈیا بیان میں یو پی ایس سی نے کہا کہ اس نے پوجا منورما دلیپ کھیڈکر، جو کہ سول سروسز امتحان 2022 کی امیدوار ہیں، کے کیس کی مکمل تحقیقات کی ہے۔تفتیش میں اس بات کا انکشاف ہوا ہے کہ پوجا نے اپنا نام، اپنے والد اور والدہ کا نام، تصویر/ دستخط، ای میل آئی ڈی، موبائل نمبر کو تبدیل کرکے اپنی اصل شناخت کو جعلی بنا کر امتحان دی تھی۔ اس لیے کمیشن نے اس کے خلاف ایف آئی آر درج کرانے کا فیصلہ کیا ہے اور اس کی سول سروسز کی امیدواری کو منسوخ کرنے کے لیے وجہ بتاؤ نوٹس بھی جاری کیا ہے۔

اس کے علاوہ اس پر مستقبل میں کسی بھی امتحانات میں بیٹھنے سے بھی روک دیا گیا ہے۔یو پی ایس سی نے اپنے بیان میں مزید کہا کہ یو پی ایس سی اپنی آئینی ذمہ داریوں کی سختی سے پابندی کرتی ہے اور اپنے امتحان کے تمام پروسیس کو بغیر کسی سمجھوتہ کے انتہائی مستعدی کے ساتھ انجام دیتی ہے۔ بیان میں مزید کہا گیا ہے کہ یو پی ایس سی نے اپنے تمام امتحانی عمل کو شفافیت اور قواعد کی سختی سے پابندی کے ساتھ یقینی بنایا ہے۔

یو پی ایس سی نے پوجا کھیڈکر کیخلاف درج کرائی ایف آئی آر

یو پی ایس سی نے آئی اے ایس پوجا کھیڈکر کے خلاف ایف آئی آر درج کرائی ہے۔ پوجا کھیڈکر پر دھوکہ دہی سے فائدہ اٹھانے کا الزام ہے۔ کمیشن نے ان کے انتخاب کو منسوخ کرنے اور مستقبل کے امتحانات سے منع کرنے پر انہیں وجہ بتاؤ نوٹس بھی جاری کیا ہے۔ دہلی کرائم برانچ نے یہ ایف آئی آر درج کی ہے۔ یو پی ایس سی نے کہا کہ اس نے تحقیقات کی اور پایا کہ پوجا کھیڈکر نے قواعد کی خلاف ورزی کی ہے۔یو پی ایس سی نے ایک پریس بیان میں کہاکہ یو پی ایس سی نے سول سروسز امتحان -2022 کے لیے عارضی طور پر تجویز کردہ امیدوار محترمہ پوجا منورما دلیپ کھیڈکر کے طرز عمل کی چھان بین کی ہے۔تحقیقات سے پتہ چلا کہ اس نے جعلی شناخت بنا کر اپنا نام، اپنے والد اور والدہ کا نام، اس کی تصویر/دستخط، اس کی ای میل آئی ڈی، موبائل نمبر اور ایڈریس، امتحان کے تحت قابل اجازت حد سے زیادہ تبدیل کرکے فائدہ اٹھانے کی کوشش کی تھی۔

بیان میں مزید کہا گیا ہے کہ لہذا، یو پی ایس سی نے پولیس حکام کے ساتھ ایف آئی آر درج کرکے مجرمانہ استغاثہ سمیت ان کے خلاف کارروائی شروع کی ہے اور سول سروسز کی ان کی امیدواری کو منسوخ کرنے کے لیے وجہ بتاو نوٹس جاری کیا ہے۔ انہیں سول سروسز ایگزامینیشن-2022 کے قواعد کے مطابق مستقبل کے امتحانات/انتخابات سے روک دیا جائے گا۔پوجا کھیڈکر، جس نے جون 2024 میں پونے کلکٹریٹ میں بطور ٹرینی شمولیت اختیار کی تھی، پر یہ بھی الزام ہے کہ انہوں نے دیگر پسماندہ طبقے اور بینچ مارک ڈس ایبلٹیز کے کوٹے کا غلط استعمال کرتے ہوئے یو پی ایس سی سول سروسز کے امتحان میں کامیابی حاصل کی۔

لال بہادر شاستری نیشنل اکیڈمی آف ایڈمنسٹریشن نے پوجا کے ضلعی تربیتی پروگرام کو روک دیا اور اسے واشیم سے اکیڈمی واپس بلا لیا۔پونے کے کلکٹر سوہاس دیواسے نے پوجا کھیڈکر کے مطالبات کے حوالے سے رپورٹ پیش کی تھی اور اس طرح سے یہ سارا معاملہ شروع ہوا۔ اس وجہ سے اب پوجا کا کریئر بھی خطرے میں ہے۔ اب پوجا کے خلاف بھی فوجداری مقدمہ درج کیا جائے گا۔ پولیس نے جون 2023 کے ایک واقعے کے حوالے سے پوجا کھیڈکر کی والدہ اور والد کے خلاف بھی مقدمہ درج کیا ہے۔