دوحہ، 22نومبر:(اردودنیا.اِن/ایجنسیاں)کرکٹ کی طرح فٹ بال کے فیفا ورلڈکپ 2022 میں بھی پہلا اور بہت بڑا اپ سیٹ ہوگیا، جہاں کمزور سمجھی جانے والی سعودی عرب نے ارجنٹینا کو ایک مقابلے میں دو گولز سے ذلت آمیز شکست دی۔ قطر کے لوسیل اسٹیڈیم میں کھیلے گئے گروپ سی کے اس میچ میں ارجنٹینا کو 10ویں منٹ میں پنالٹی اسٹروک ملی جس کا فائدہ اٹھاتے ہوئے کپتان میسی نے اپنی ٹیم کو 0-1 کی برتری دلائی۔ میچ کے پہلے ہاف کا اختتام جنوبی امریکی ٹیم کی برتری کے ساتھ ہوا تاہم دوسرے ہاف کے آغاز میں سعودی عرب نے ارجنٹائن کے دفاع کوچاروں خانے چت کردیا ۔
پہلے 48 ویں منٹ میں صالح الشھری Saleh Alshehri کے گول کی مدد سے اسکور 1-1 سے برابر ہوا پھر صرف 5 منٹ کے فرق کے بعد سالم محمد الدوسری Salem Aldawsari کے گول کی مدد سے 1-2 کی برتری حاصل کرلی۔ اس کے بعد میسی الیون نے میچ میں سعودی عرب کی برتری ختم کرنے کے لیے اس کے گول پر تابڑ توڑ حملے کیے ،لیکن ان کی کوششیں ناکام رہیں،اور 1-2 کے اسکور کے ساتھ ہی اس میچ کا اختتام ہوگیا۔خیال رہے کہ یہ سعودی عرب اور ارجنٹینا کا ورلڈکپ میں پہلا مقابلہ تھا۔ جبکہ مجموعی طور پر دونوں ٹیموں کے درمیان کھیلے گئے 4 میچز میں سے 2 میں ارجنٹینا کامیاب رہا، جبکہ دو برابر رہے تھے۔
