اترپردیش: پیٹرول ختم ہونے کی وجہ سے مریض کو نہیں ملی ایمبولینس ، ٹھیلے پر اسپتال لے جایا گیا

بلیا،07؍مئی :(اردودنیا.اِن/ایجنسیاں)اب سب کو معلوم ہو گیا ہوگا کہ ہندوستان میں صحت کی خدمات کی حالت کتنی خراب ہے۔ کورونا نے مزید واضح کر دیا ہے کہ ملک میں صحت کا نظام بہت خراب ہے۔ اسی دوران یوپی کے بلیا سے صحت کی خدمات کو بے نقاب کرنے والا ایک اور تازہ معاملہ سامنے آیا ہے۔ جہاں ریوتی میں ایمبولینس آپریٹر نے پیٹرول کی کمی کی وجہ سے جانے سے انکار کردیا، لواحقین مریض کو ٹھیلے پر اسپتال لے گئے۔اب اس واقعے کی ویڈیو بھی سوشل میڈیا پر کئی جگہوں پر شیئر کی گئی ہے، جو کافی وائرل ہو رہی ہے۔ وائرل ویڈیو میں دیکھا جا سکتا ہے کہ ایک مریض کو اس کے گھر والے ٹھیلے پر لے جا رہے ہیں۔ یہ ویڈیو پرائمری ہیلتھ سنٹر ریوتی کا بتایا جا رہا ہے۔ اس سلسلے میں چیف میڈیکل آفیسر بلیا نیرج پانڈے کا کہنا ہے کہ مریض کو سر میں درد ہونے کے بعد پرائمری ہیلتھ سینٹر لایا گیا تھا۔

اس کے بعد مریض کو وہاں سے ریفر کر دیا گیا۔ لیکن جب ایمبولینس میں تیل نہیں تھا تو سی ایم او نے کہا کہ ایمبولینس ایک رات پہلے بنارس سے آئی تھی اور اس میں پیٹرول نہیں تھا۔ جس کی وجہ سے اسے ایمبولینس نہیں مل سکی جس کے بعد مریض کے لواحقین اسے ٹھیلے پر لے گئے۔ اس سلسلے میں تحقیقات کی جا رہی ہیں، معاملہ بہت سنگین ہے۔ تحقیقات میں جو بھی قصوروار پایا گیا اس کے خلاف کارروائی کی جائے گی۔واضح رہے کہ یہ پہلا کیس نہیں ہے، جب کسی مریض کو وقت پر ایمبولینس نہ ملی ہو۔ ملک بھر سے اکثر ایسی خبریں آتی رہتی ہیں کہ ایمبولینس سروس بھی مریض کو ضرورت کے وقت فراہم نہیں کی گئی۔ جب ایسے کیسز منظر عام پر آتے ہیں تو ان کیسز کو ہمیشہ تفتیش کی بات کرکے چھپایا جاتا ہے۔ لیکن اسپتالوں کی اس کوتاہی کی وجہ سے کئی جانیں چلی جاتی ہیں۔