ورنگل میں دل دہلا دینے والا واقعہ، 16 دن بعد نئی نویلی دلہن کی خودکشی

ورنگل، 29 دسمبر (اردو دنیا نیوز):تلنگانہ کے ورنگل ضلع میں دل دہلا دینے والا واقعہ پیش آیا جہاں ایک نئی نویلی دلہن نے اپنے سسرالی مکان میں پنکھے سے لٹک کر خودکشی کرلی۔ یہ واقعہ ورنگل اربن ضلع کے مانکیاپورم گاؤں میں پیش آیا۔

پولیس کے مطابق راوالی نامی لڑکی، جو ضلع کے نارائن گری علاقے کی رہنے والی تھی، کی شادی 16 دن قبل مانکیاپورم گاؤں کے نوجوان راجو سے ہوئی تھی۔ تاہم، راوالی کی محبت کسی اور نوجوان سے تھی، اور اس نے والدین کی مرضی سے اس رشتے کو قبول کیا تھا۔

شادی کے بعد ذہنی دباؤ اور جذباتی کشمکش سے تنگ آکر، اس نے کل شب انتہائی اقدام اٹھایا۔ خودکشی سے پہلے راوالی نے ایک سوسائیڈ نوٹ چھوڑا جس میں اس نے لکھا کہ اس کی موت کا ذمہ دار کوئی نہیں ہے۔ ساتھ ہی اس نے شوہر سے معافی بھی مانگی اور مذہب یا ذات کو بنیاد نہ بنانے کی تلقین کی۔

پولیس نے موقع پر پہنچ کر لاش کو پوسٹ مارٹم کے لئے روانہ کیا اور کیس درج کرلیا ہے۔ اس واقعہ نے نہ صرف متاثرہ خاندان کو غم زدہ کر دیا بلکہ مقامی عوام میں بھی افسردگی پھیلا دی۔