کجریوال کے لیے انتباہ : میرے خلاف ایک لفظ بھی بولا تو میں کیس کردوں گا: ہیمنت بسوا سرما

گوہاٹی ،یکم اپریل:(اردودنیانیوز.کام/ایجنسیز) دہلی کے وزیر اعلیٰ اروند کجریوال 2 اپریل کو آسام میں ایک ریلی کریں گے ،اس ریلی سے پہلے آسام کے وزیر اعلیٰ ہیمنت بسوا سرما نے انھیں تنبیہ کی ہے کہ کجریوال ان کے خلاف ایک لفظ نہ بولیں ،ورنہ وہ کارروائی سے پیچھے نہیں ہٹیں گے۔ ہیمنت بسوا سرما نے متنبہ کیا ہے کہ اگر کجریوال نے ان پر جھوٹے الزامات عائد کیے تو وہ ان کے خلاف مقدمہ کر یں گے۔آسام کے وزیر اعلیٰ کا یہ بیان ایسے وقت میں آیا ہے جب مبینہ طور پر اروند کجریوال نے دہلی اسمبلی میں بیان دیا کہ ہیمنت بسوا سرما کے خلاف کئی ریاستوں میں معاملے درج ہیں۔ اس تعلق سے میڈیا سے بات کرتے ہوئے آسام کے وزیر اعلیٰ نے کہا کہ کیا میرے خلاف ملک کے کسی حصے میں معاملہ درج ہے؟ میں ہتک عزتی کا معاملہ درج کرانا چاہتا ہوں لیکن اروند کجریوال بزدل کی طرح اسمبلی میں بول رہے ہیں۔

انھیں 2 اپریل کو آسام آنے دیجیے اور یہ کہنے دیجیے کہ ہیمنت بسوا سرما کے خلاف معاملے درج ہیں۔ میں ان کے خلاف کیس درج کرا دوں گا۔ہیمنت بسوا سرما نے کیجریوال کو تنبیہ دیتے ہوئے واضح لفظوں میں کہا کہ میرے خلاف ایک بھی لفظ بولا کہ میں بدعنوان ہوں تو اگلے ہی دن میں کجریوال کے خلاف ہتک عزتی کا مقدمہ کر دوں گا۔ جیسے میں نے منیش سیسودیا کے خلاف کیا تھا۔ ساتھ ہی سرما نے کہا کہ آپ کو(کیجریوال) کسی کے خلاف اسمبلی میں نہیں بولنا چاہیے، جبکہ آپ کو پتہ ہے کہ میں وہاں اپنا دفاع کرنے کے لیے موجود نہیں رہوں گا۔ آسام کے وزیراعلیٰ کے مطابق لوگوں کو گمراہ کیا جارہا ہے، پورے ملک میں میرے خلاف کوئی مقدمہ نہیں ہے۔واضح رہے کہ اروند کجریوال اور ان کی پارٹی اب شمال مشرقی ریاست آسام میں اپنی سیاسی زمین تلاش کر رہی ہے۔ اسی کے پیش نظر کجریوال 2 اپریل کو آسام کا دورہ کرنے والے ہیں۔ وہ یہاں ایک جلسہ عام سے خطاب بھی کریں گے۔ کجریوال کے ساتھ پنجاب کے وزیر اعلیٰ بھگونت مان بھی موجود رہیں گے۔ یہ جلسہ عام گواہاٹی کے بھرلومکھ واقع سونارام ہائی اسکول میں منعقد ہوگا۔