واشنگٹن میں پہلی بار H5N5 برڈ فلو کا انسانی کیس، مریض کی حالت تشویشناک

واشنگٹن:(اردودنیا.اِن/ایجنسیز)امریکہ کی ریاست واشنگٹن میں پہلی بار ایک ایسا برڈ فلو وائرس انسان میں پایا گیا ہے جو اس سے پہلے کبھی انسانی جسم میں نہیں دیکھا گیا تھا۔ رپورٹس کے مطابق ایک بزرگ شخص کو شدید بخار، ذہنی الجھن اور سانس لینے میں دشواری کے باعث اسپتال لایا گیا، جہاں ٹیسٹ کے بعد اس میں H5N5 نامی ایویئن انفلوئنزا کی تصدیق ہوئی۔ اس وائرس کا انفیکشن اب تک جنگلی پرندوں، گھریلو مرغیوں، دودھ دینے والی گایوں اور کچھ انسانوں میں بھی پایا جا چکا ہے خصوصاً جنگلی پرندوں جیسے بطخوں اور ہنسوں میں۔

واشنگٹن اسٹیٹ ڈپارٹمنٹ آف ہیلتھ نے تصدیق کی ہے کہ مریض کی عمر زیادہ ہے اور انہیں پہلے سے صحت کے مسائل لاحق تھے۔ تفتیش سے پتا چلا ہے کہ مریض کے گھر میں ایک پولٹری فارم موجود ہے، جہاں دو پرندے حال ہی میں مردہ ملے تھے۔ حکام کا کہنا ہے کہ امکان ہے کہ وائرس انہی پرندوں یا اردگرد کے جنگلی پرندوں سے متاثرہ شخص تک منتقل ہوا ہو، تاہم حتمی وجوہات جاننے کے لیے تحقیقات جاری ہیں۔

حکام نے بتایا کہ عوام کے لیے اس وائرس سے خطرہ نہایت کم ہے اور فی الحال انسانی آبادی میں اس کے پھیلاؤ کا کوئی امکان ظاہر نہیں کیا گیا۔ ان کے مطابق امریکہ میں ایویئن انفلوئنزا کے انسانی کیسز انتہائی نایاب ہوتے ہیں اور زیادہ تر وہی افراد متاثر ہوتے ہیں جو براہِ راست بیمار یا مردہ پرندوں کے قریب رہے ہوں۔ محکمہ صحت نے شہریوں کو مشورہ دیا ہے کہ مردہ پرندوں کو ہاتھ نہ لگائیں، گھریلو پولٹری کی صفائی کا خاص خیال رکھیں اور کسی غیر معمولی علامت کی صورت میں ڈاکٹر سے رابطہ کریں۔