قومی خبریں
موسم کی پیشن گوئی: آئندہ3-4 دنوں تک کچھ علاقوں میں ہوسکتی ہے بارش اور برفباری سردی بڑھنے کا امکان
نئی دہلی ،25 ؍دسمبر :(اردودنیا.اِن/ایجنسیاں) قومی راجدھانی دہلی میں ہفتہ کی صبح سخت سردی تھی اور کم سے کم درجہ حرارت 7 ڈگری سیلسیس ریکارڈ کیا گیا جو معمول سے ایک ڈگری کم ہے۔ ہندوستان کے محکمہ موسمیات (آئی ایم ڈی) کے مطابق دن کے وقت زیادہ سے زیادہ درجہ حرارت 22 ڈگری تک رہ سکتا ہے۔ آئی ایم ڈی کے مطابق ہفتہ کی صبح دارالحکومت دہلی سمیت پورے شمالی ہندوستان میں ’دھند‘ چھائی ہوئی تھی۔ جس کی وجہ سے دیکھنے کی صلاحیت کم تھی ۔
تاہم آئی جی آئی ایئرپورٹ پر طیاروں کی آمدورفت جاری رہی۔محکمہ موسمیات کے مطابق ہفتہ کی صبح پنجاب اور شمال مغربی راجستھان کے کچھ حصوں میں گھنی دھند ریکارڈ کی گئی۔ دہلی میں معمولی دھند رہی جبکہ اتر پردیش اور بہار کے کئی علاقوں میں ہلکی دھند چھائی رہی۔
دہلی میں آج صبح حد نگاہ 200 میٹر ریکارڈ کی گئی۔ دہلی کے کچھ علاقوں میں لوگ صبح کی سردی میں آگ سے ہاتھ جلاتے ہوئے دیکھے گئے۔ محکمہ موسمیات کی تازہ ترین پیشین گوئی کے مطابق 25 دسمبر کو جموں و کشمیر، اروناچل پردیش، آسام، میگھالیہ، سکم اور مغربی بنگال کے کچھ حصوں میں بارش اور برف باری ہو سکتی ہے، جبکہ 26 دسمبر کو جموں و کشمیر کے علاوہ دیگر علاقوں میں بارش اور برفباری ہو سکتی ہے۔
ہماچل پردیش، اتراکھنڈ، پنجاب، ہریانہ، راجستھان، دہلی اور اتر پردیش کے کچھ حصوں میں بھی ہلکی بارش کا امکان ہے۔آئی ایم ڈی کے مطابق 27 دسمبر کو ان ریاستوں کے علاوہ مشرقی یوپی، بہار، جھارکھنڈ، مدھیہ پردیش، چھتیس گڑھ، پورے راجستھان، اڈیشہ اور ودربھ کے کچھ علاقوں میں ہلکی بارش یا بوندا باندی ہو سکتی ہے۔
اس کے نتیجے میں درجہ حرارت میں کمی واقع ہوسکتی ہے۔دوسری جانب کشمیر میں زیادہ تر مقامات پر کم سے کم درجہ حرارت نقطہ انجماد سے اوپر ریکارڈ کیا گیا۔ ماہرین موسمیات نے اتوار سے دو دن تک مرکز کے زیر انتظام علاقوں میں کچھ مقامات پر ہلکی اور درمیانی برفباری کی پیش گوئی کی ہے۔
محکمہ موسمیات کے مطابق جموں و کشمیر، اتراکھنڈ، ہماچل پردیش میں اگلے تین سے چار دنوں تک بارش اور برفباری کا امکان ہے۔ جس کی وجہ سے اگلے ہفتے پورے شمالی ہندوستان سمیت میدانی علاقوں میں سردی بڑھنے کا امکان ہے تاہم محکمہ موسمیات نے فی الحال سردی کی لہر کی کوئی وارننگ جاری نہیں کی ہے۔
ماہر موسمیات نے کہاکہ 26 دسمبر کی شام سے 28 دسمبر کی دوپہر تک مغربی ڈسٹربنس کی وجہ سے مزید دباؤ بننے کی امید ہے۔ اس کی وجہ سے کشمیر کے میدانی علاقوں میں ہلکی سے اعتدال پسند برفباری (دو سے تین انچ)، جموں و کشمیر کے اونچے علاقوں میں متعدل برفباری، اور لداخ کے کچھ مقامات پر ہلکی برفباری کا امکان ہے۔
