مغربی بنگال پولیس نے شیخ شاہجہان کو سی بی آئی کے کیا حوالے کردیا
شاہجہاں شیخ کو لے کر پی ایم مودی کے نشانہ پر ٹی ایم سی کا جوابی وار
کولکاتہ ،6مارچ :(اردودنیانیوز.کام/ایجنسیز)مغربی بنگال پولیس نے سندیش کھلی کے مرکزی ملزم شیخ شاہجہان کو بدھ کی شام تقریباً 7.45 بجے مرکزی تفتیشی ایجنسی (سی بی آئی) کے حوالے کر دیا ہے۔ کلکتہ ہائی کورٹ نے بدھ کی شام 4.15 بجے تک شاہجہان کو سی بی آئی کے حوالے کرنے کی ہدایت دی تھی۔تاہم مغربی بنگال پولس نے عدالتی مہلت کے تقریباً ڈھائی گھنٹے بعد شاہجہاں کو سی بی آئی کی تحویل میں دے دیا۔کلکتہ ہائی کورٹ کی ہدایت کے مطابق سی بی آئی کی ٹیم بدھ کی شام 4.15 بجے سے پہلے کولکتہ میں پولیس ہیڈکوارٹر پہنچ گئی تھی۔ مغربی بنگال پولیس نے شاہجہان کو سی بی آئی کے حوالے کرنے سے پہلے اس کا میڈیکل ٹیسٹ کرایا۔ سندیش کھلی ملزم شاہجہان کو طبی علاج کے لیے ایس ایس کے ایم اسپتال لے جایا گیا۔
میڈیکل کے بعد شاہجہان کو کولکتہ کے بھبانی بھون پولیس ہیڈ کوارٹر لے جایا گیا، جہاں سے اس کی تحویل سی بی آئی کو دے دی گئی۔اس سے پہلے جب منگل کو بنگال پولس نے شیخ شاہجہان کی تحویل سی بی آئی کے حوالے نہیں کی تھی تو بدھ کو یہ معاملہ دوبارہ کلکتہ ہائی کورٹ پہنچا۔ کلکتہ ہائی کورٹ کے جسٹس ہریش ٹنڈن اور جسٹس ہیرنامائے بھٹاچاریہ کی بنچ نے کیس کی سماعت کرتے ہوئے اسے عدالتی حکم کی توہین قرار دیا۔ اس کے علاوہ کلکتہ ہائی کورٹ نے بنگال پولیس کو نوٹس جاری کرتے ہوئے 2 ہفتے کے اندر جواب دینے کو کہا ہے۔
دریں اثنا، ہائی کورٹ نے سندیش کھلی کے اہم ملزم شیخ شاہجہان کو سی بی آئی کی تحویل میں دینے کے لیے بدھ کو شام 4.15 بجے کی آخری تاریخ مقرر کی ہے۔منگل کو ریاست کی ممتا بنرجی حکومت کلکتہ ہائی کورٹ کے حکم کو چیلنج کرتے ہوئے سپریم کورٹ پہنچی تھی۔ جب بدھ کو سپریم کورٹ میں اس کیس کی جلد سماعت کی مانگ کی گئی تو جسٹس سنجیو کھنہ کی بنچ نے اسے مسترد کر دیا۔ اس کے بعد یہ فیصلہ کیا گیا کہ بنگال پولیس کو بدھ کی شام تک شیخ شاہجہان کو سی بی آئی کے حوالے کرنا ہوگا۔
شاہجہاں شیخ کو لے کر پی ایم مودی کے نشانہ پر ٹی ایم سی کا جوابی وار,خواتین کے تحفظ کے تئیں بی جے پی کو بولنے کا کوئی حق ہی نہیں :ٹی ایم سی
کولکاتہ ،6مارچ :(اردودنیانیوز.کام/ایجنسیز)پی ایم مودی پر دوہرا معیار اپنانے کا الزام لگاتے ہوئے ترنمول کانگریس (ٹی ایم سی) نے بدھ (6 فروری) کو کہا کہ انہیں بی جے پی کو خواتین کی حفاظت پردوسروں کو نصیحت کرنے کا کوئی حق نہیں ہے کیونکہ بی جے پی لیڈروں پر خواتین پہلوانوں کو جنسی طور پر ہراساں کرنے کا الزام لگایا گیا ہے۔ترنمول کانگریس کے سینئر لیڈر اور پارٹی کے راجیہ سبھا ممبر ڈیرک اوبرائن نے بھی دعویٰ کیا کہ ملک میں ہر گھنٹے میں خواتین کیخلاف جرائم کے 51 کیس درج ہو رہے ہیں۔ ڈیرک نے وزیر اعظم سے پوچھا کہ انہوں نے صورتحال کو بہتر بنانے کے لیے کیا کیا ہے۔ بدھ (6 مارچ) کو باراسات میں ایک ریلی سے خطاب کرتے ہوئے وزیر اعظم مودی نے کہا کہ سندیشکھلی کا طوفان مغربی بنگال کے ہر حصے میں پہنچے گا۔ انہوں نے کہا کہ ریاست میں حکمراں ترنمول کو تباہ کرنے میں خواتین کی طاقت اہم کردار ادا کرے گی۔ترنمول کے معطل لیڈر شاہجہاں شیخ اور ان کے ساتھیوں کے خلاف خواتین کی جنسی ہراسانی اور زمین پر قبضے کے الزامات کو لے کر شمالی 24 پرگنہ ضلع کے سندیش کھلی میں ہنگامہ ہے۔ٹی ایم سی لیڈر ڈیرک نے اپنے ایکس ہینڈل پر ایک پوسٹ میں کہا،‘‘آج وزیر اعظم نریندر مودی نے آج خطاب کیا۔
آپ سے تین سوال: جناب، ہر گھنٹے میں خواتین کے خلاف جرائم کے 51 کیسز کیوں ہوتے ہیں؟ لوک سبھا میں بی جے پی کے پاس 13 فیصد خواتین کیوں ہیں، 195 امیدواروں کی فہرست میں صرف 14 فیصد خواتین کیوں ہیں؟
ٹی ایم سی لیڈر ڈیرک کا تیسرا سوال تھا ’’بھارتیہ جنتا پارٹی (بی جے پی) کے رکن پارلیمنٹ کیخلاف پہلوانوں کو جنسی طور پر ہراساں کرنے کے الزام میں کوئی کارروائی کیوں نہیں کی گئی؟ یہ سوال بی جے پی کے رکن پارلیمنٹ اور ریسلنگ فیڈریشن آف انڈیا (ڈبلیو ایف آئی) کے سابق سربراہ برج بھوشن شرن سنگھ کے بارے میں تھا، جن پر خواتین ریسلرز کو جنسی طور پر ہراساں کرنے کا الزام ہے۔ تاہم برج بھوشن شرن سنگھ نے ان الزامات کو مسترد کر دیا ہے۔ترنمول کی راجیہ سبھا رکن سشمیتا دیو نے سوال کیا کہ کیا مودی کو عصمت دری کرنے والوں کے خلاف حکومت کی طرف سے اٹھائے گئے اقدامات پر بولنے کا اخلاقی حق ہے؟ انہوں نے کہا کہ بی جے پی لیڈروں اور کارکنوں نے بلقیس بانو کی عصمت دری کرنے والوں کو عزت دی تھی۔گجرات کے 2002 کے بلقیس بانو کیس کے 11 مجرموں کو رہا کیا گیا تھا اور 2023 میں جیل سے رہائی کے بعد، بی جے پی کے رہنماؤں نے ہار پہنا کر ان کا استقبال کیا۔ تاہم اس سال 8 جنوری کو سپریم کورٹ نے گجرات حکومت کے ان مجرموں کو رہا کرنے کے فیصلے کو منسوخ کر دیا تھا۔
ٹی ایم سی لیڈر سشمیتا دیو نے کہاکہ آپ (مودی) خواتین کے تحفظ کی بات کر رہے ہیں جب دہلی میں جنتر منتر کے باہر احتجاج کرنے پر ہریانہ کی خواتین پہلوانوں کو دہلی پولس نے بری طرح پیٹا تھا۔ اس وقت خواتین کے لیے آپ کی ہیلپ لائن کہاں تھی؟ مودی پر دوہرا معیار اپنانے کا الزام لگاتے ہوئے انہوں نے دعویٰ کیا کہ آپ کے بیانات ایک مذاق کے سوا کچھ نہیں، آپ کا اصل چہرہ خواتین مخالف ہے اور پورا ہندوستان یہ جانتا ہے۔مغربی بنگال کے وزیر اور ترنمول کانگریس کے سینئر لیڈر ششی پنجا نے کہاکہ یہ دیکھتے ہوئے کہ بی جے پی لیڈروں نے ایک میم میں ماں شاردھا کا مذاق اڑایا ہے، پی ایم مودی کے پاس اپنی تقریر میں ماں شاردا اور ناری شکتی کا نام لینے کی کوئی وجہ نہیں ہے۔
