خاتون نے عاشق کے ساتھ مل کر شوہر کو قتل کیا، کمسن بیٹیوں نے ماں کا جرم بے نقاب کر دیا

ممبئی:(اردودنیا.اِن/ایجنسیز)مہاراشٹر سے ایک چونکا دینے والی خبر سامنے آئی ہے جہاں ایک 35 سالہ خاتون راج شری آہیرے نے اپنے عاشق چندر شیکھر پڈایاچی کے ساتھ مل کر اپنے شوہر بھرت لکشمن آہیرے کو موت کے گھاٹ اتار دیا۔ مقتول بھرت ایک پیشہ ور میک اپ آرٹسٹ تھا۔

آرے کالونی پولیس نے راج شری کو گرفتار کر لیا ہے، جبکہ اس کا عاشق چندر شیکھر اور اس کا ساتھی رنگا ابھی تک مفرور ہیں۔ پولیس کے مطابق،”راج شری کے شوہر کو اُس کے عاشق سے تعلقات کا علم ہو گیا تھا، جس کے بعد صورتحال کشیدہ ہو گئی۔”جس پر دونوں میاں بیوی کے درمیان تنازعہ ہوا۔

جون میں بھرت نے اس رشتے پر سوال اٹھایا تو راج شری نے اس پر ہراساں کرنے کا الزام لگایا۔ بعد ازاں چندر شیکھر نے بھرت کو آرے کالونی، یونٹ نمبر 31 میں ایک پبلک ٹوائلٹ کے قریب ملنے کو کہا۔ ملاقات کے وقت راج شری بھی موجود تھی۔

پولیس کے مطابق چندر شیکھر اور رنگا نے بھرت پر حملہ کیا، اسے پیچھے سے پکڑ کر اس کے سینے، پیٹ اور دیگر اعضاء پر گھونسے مارے۔ حملے کے بعد وہ موقع سے فرار ہوگئے۔ حیرت انگیز طور پر، راج شری نے نہ تو مدد طلب کی اور نہ ہی پولیس کو بلایا، بلکہ زخمی شوہر کو اسپتال لے جانے کے بجائے گھر لے آئی۔

بھرت کی حالت بگڑتی گئی اور وہ تین دن تک بغیر علاج کے درد میں مبتلا رہا۔ گھر میں موجود تین بیٹیاں، جن کی عمریں 13، 5 اور 3 سال تھیں، یہ سب دیکھ رہی تھیں۔ جب بھرت کو خون کی قے آئی، تو بڑی بیٹی نے رشتہ داروں کو اطلاع دی۔

پھر بھرت کی بھابھی ان کے گھر پہنچی، جہاں راج شری نے دعویٰ کیا کہ بھرت ایک موٹر سائیکل حادثے میں زخمی ہوا ہے۔ بعد ازاں بھرت کو ملاڈ ایسٹ کے ایک سپر اسپیشلٹی اسپتال میں داخل کرایا گیا، جہاں اس نے بھی دباؤ اور خوف کی وجہ سے وہی جھوٹ دہرا دیا۔

تاہم، پولیس کو شک ہوا اور مزید تفتیش پر کئی تضادات سامنے آئے۔ پولیس نے جب 13 سالہ بیٹی سے بات کی تو اس نے سچ بیان کر دیا کہ اس کی ماں موقع پر خاموش کھڑی رہی، اور حملہ ہوتے دیکھ کر بھی کچھ نہیں کیا۔

بالآخر 5 اگست کو علاج کے دوران بھرت کی موت واقع ہو گئی۔ بیٹی کے بیان کی بنیاد پر پولیس نے راج شری کو گرفتار کر لیا ہے، جبکہ چندر شیکھر اور رنگا کی تلاش جاری ہے۔