ممبئی ،24اپریل :(اردودنیا.اِن/ایجنسیاں)ملک میں گہرے ہوتے کوئلہ بحران نے مہاراشٹر کے 7 پاور پلانٹس کو بھی متاثر کیا ہے۔ ریاست کے بہت سے پاور اسٹیشنوں میں کوئلے کا صرف ایک یا دو دن کا ذخیرہ باقی رہ گیا ہے۔ کوئلے کی قلت کے باعث بجلی کی پیداوار پوری صلاحیت سے نہیں ہو رہی۔ تاہم مرکزی وزیر کوئلہ نے کوئلے کی قلت سے انکار کیا ہے۔ ان کا دعویٰ ہے کہ کوئلہ ایک ماہ تک چلنے کے لیے دستیاب ہے۔
مہاراشٹر میں ناسک، بھوساول، بیڈ، چندر پور، کھاپرکھیڑا اور پارس میں تھرمل پاور پر مبنی 7 پاور پلانٹس ہیں۔ ان پلانٹس کی بجلی پیدا کرنے کی صلاحیت 9540 میگاواٹ ہے۔ رپورٹ کے مطابق فی الحال وہ صرف 6900 میگاواٹ بجلی پیدا کرنے کے قابل ہیں۔ اس کی وجہ کوئلے کا بحران ہے۔ پاور جنریشن حکام نے بتایا کہ ان پلانٹس کو پوری صلاحیت سے چلنے کے لیے روزانہ تقریباً 1.45 لاکھ میٹرک ٹن کوئلے کی ضرورت ہوتی ہے، لیکن ہفتہ کو صرف 6.5 لاکھ میٹرک ٹن کوئلہ بیک اپ میں تھا۔
حکام کے مطابق ناسک اور بھوساول پلانٹس میں صرف ایک یا دو دن کا کوئلہ بچا ہے، جبکہ 7 دن کا بیک اپ ہونا چاہیے۔ باقی پاور پلانٹس میں صرف چند دنوں کا اسٹاک رہ گیا ہے۔ حالانکہ ان کا یہ بھی ماننا ہے کہ کوئلے کا یہ بحران پچھلے تین چار ماہ سے ہے لیکن اس وقت گرمی کی وجہ سے بجلی کی مانگ بڑھ گئی ہے۔ اس صورت میں کوئلے کی قلت پیش آئی ہے۔
