نئی دہلی،22 جون:(اردودنیانیوز.کام/ایجنسیز)مہندر سنگھ دھونی کی کپتانی میں چنئی سپر کنگز نے 5 ویں بار آئی پی ایل کا ٹائٹل اپنے نام کیا۔ اس کے ساتھ ہی چنئی ممبئی انڈینس کے ساتھ پانچ بار ٹائٹل جیتنے والی ٹیم بن گئی۔ تاہم دھونی نے آئی پی ایل 2023 میں گھٹنے کی انجری سے لڑتے ہوئے کھیلا۔ ٹیم کو چمپئن بنانے کے فوراً بعد دھونی کو گھٹنے کی سرجری کرانی پڑی۔ وہ اس وقت سرجری کے بعد صحت یاب ہو رہے ہیں۔ دریں اثنا چنئی سپر کنگز کے سی ای او کاشی وشواناتھن نے دھونی کے اگلے آئی پی ایل یعنی 2024 میں کھیلنے کے بارے میں بڑا بیان دیا ہے۔چنئی سپر کنگز کے سی ای او کاشی وشواناتھن نے حال ہی میں سرجری کے بعد ممبئی میں دھونی سے ملاقات کی اور ان کی صحت کے بارے میں اپ ڈیٹ دیا۔ دھونی فروری تک میدان میں نظر نہیں آئیں گے اور صحت یابی شروع ہونے سے پہلے 3 ہفتے کی چھٹی لیں گے۔
چنئی سپر کنگز کے سی ای او کاشی وشواناتھن نے کہاکہ دھونی اچھی طرح جانتے ہیں کہ انہیں آگے کیا کرنا ہے۔ اگر انہیں آئی پی ایل سے ریٹائرمنٹ سے متعلق کوئی فیصلہ لینا ہے تو وہ براہ راست این کے کے پاس جائیں گے۔ سری نواسن سے جا کر بات کریں گے۔ چنئی سپر کنگز کے ساتھ ان کا سفر 2008 میں شروع ہوا اور اب بھی جاری رہے گا۔وشواناتھن نے مزید کہا کہ دھونی پہلے میچ سے ہی گھٹنے کے درد میں مبتلا تھے، لیکن انہوں نے فائنل تک اس کا ذکر نہیں کیا۔ اس نے کبھی اپنے گھٹنے کے مسئلے کی شکایت نہیں کی، تاہم سبھی جانتے تھے کہ دھونی کتنی پریشانی میں تھے۔ وہ دوڑنے کے قابل نہیں تھے۔ فائنل جیتنے کے بعد انہوں نے کہا تھا کہ اب میں گھٹنے کی سرجری کرواؤں گا۔ اس کے بعد وہ ممبئی چلے گئے اور فی الحال صحت یاب ہیں۔ انہیں مکمل طور پر فٹ ہونے میں 3 ماہ لگ سکتے ہیں۔
