’وائن شراب نہیں‘: مہاراشٹرا کی سپر مارکیٹوں اور دکانوں میں فروخت کی اجازت کا راؤت نے کیا دفاع

ممبئی، 28 جنوری:(اردودنیا.اِن/ایجنسیاں) شیوسینا کے لیڈر سنجے راوت نے مہاراشٹر کی سپر مارکیٹوں اور دکانوں میں شراب کی فروخت کا دفاع کیا ہے۔ انہوں نے اس کی مخالفت کرنے پر بی جے پی کو تنقید کا نشانہ بنایا۔ راوت نے کہا کہ وائن شراب نہیں ہے۔ اگر شراب کی فروخت بڑھے گی تو اس سے مہاراشٹر کے کسانوں کو فائدہ ہوگا۔

شیوسینا لیڈر نے بی جے پی پر تنقید کرتے ہوئے کہا کہ وہ اس کی مخالفت کر رہی ہے، لیکن اس نے کسانوں کے لیے کچھ نہیں کیا۔ ہم نے یہ قدم مہاراشٹر کے کسانوں کی آمدنی کو دوگنا کرنے کے لیے شراب کی فروخت کے حوالے سے اٹھایا ہے۔ممبئی میں صحافیوں سے بات کرتے ہوئے شیو سینا کے رکن پارلیمنٹ راوت نے کہا کہ شراب کی صنعت کا زیادہ تر انحصار انگور، چکو، امرود اور اناج پر ہے۔

شراب ان پھلوں اور اناج سے بنائی جاتی ہے جو کسان اگاتے ہیں، یہ فیصلہ کسانوں کے مفاد میں لیا گیا ہے۔ کسانوں کے مفاد میں جرات مندانہ فیصلے کرنے ہوں گے۔ اس کی مخالفت کرنے والے کسانوں کے دشمن ہیں۔

بی جے پی مہاراشٹر میں مالز، سپر مارکیٹوں اور دکانوں میں شراب کی فروخت کی مخالفت کر رہی ہے۔ پارٹی کا کہنا ہے کہ پٹرول اور ڈیزل کو سستا کرنے کے بجائے ریاستی حکومت شراب کی فروخت کے لیے سہولیات فراہم کر رہی ہے۔

مہاراشٹرا قانون ساز اسمبلی میں قائد حزب اختلاف دیویندر فڑنویس نے کہا کہ یہ مہاراشٹر ہے یا مدیا راشٹر؟ کورونا کے دور میں ریاستی حکومت نے کسانوں اور غریبوں کے لیے ایک بھی مدد کا اعلان نہیں کیا۔ وہ صرف شراب کی پرواہ کرتے ہیں۔ پٹرول اور ڈیزل مہنگا اور شراب سستی ہو رہی ہے۔