سعودیہ بائیڈن کی صدارتی دور میں امریکی تعلقات بارے پر امید
الر یاض ،22جنوری ( ویب ڈیسک ) سعودی عرب صدر جوزف بائیڈن کی قیادت میں نئی انتظامیہ میں امریکہ کے ساتھ دوطرفہ تعلقات کے حوالے سے خوش امید ہے۔یہ بات سعودی وزیرخارجہ شہزادہ فیصل بن فرحان نے جمعرات کو العربیہ نیوزچینل کے ساتھ ایک خصوصی انٹرویو میں کہی ہے۔انھوں نے کہاکہ ہم پر امید ہیں کہ بائیڈن انتظامیہ میں ہمارے امریکا کے ساتھ شاندار تعلقات استوار ہوں گے۔
انھوں نے کہا کہ صدر جو بائیڈن نے اب تک جو تقرر کیے ہیں، ان سے ان کے اجتماعی امور کو سمجھنے کی عکاسی ہوتی ہے۔جوبائیڈن نے بدھ کو امریکا کے چھیالیسویں صدر کی حیثیت سے حلف اٹھایا تھا۔انھوں نے اس موقع پر اس عزم کا اظہار کیا ہے کہ وہ دنیا بھر میں امریکا کے اتحادیوں کے ساتھ مل کرکام کریں گے اور امریکی سفارت کاری کو بحال کریں گے۔صدر بائیڈن نے کہا کہ ایران کی جوہری صلاحیتوں ، بیلسٹک میزائلوں کے پروگرام اور خطے میں تخریبی سرگرمیوں کے بارے میں مستقبل میں کسی بھی بات چیت میں خلیجی اتحادیوں اور اسرائیل کو شامل کیا جائے گا۔
شہزادہ فیصل نے انٹرویو میں ایرانی نظام پر زوردیا ہے کہ وہ اپنی ذہنیت کو تبدیل کرے اور اپنے شہریوں کی فلاح وبہبود پر اپنی توجہ مرکوز کرے۔
