بغداد دھماکوں کے بعد عراقی سکیورٹی فورسز کے ڈھانچے میں تبدیلی
بغداد ،22جنوری ( ایجنسیاں) جمعرات کے روز عراق کے دارالحکومت بغداد میں ہونے والے بم دھماکوں میں کئی سیکیورٹی اہلکار افسر ہلاک ہوئے ہیں۔ بغداد بم دھماکے کے بعد وزیراعظم مصطفیٰ الکاظمی نے سیکیورٹی فورسز کے ڈھانچے میں تبدیلیوں کے احکامات دیے ہیں۔عراقی جنرل کمانڈ کے ترجمان یحییٰ رسول نے خبر رساں ادارے سے کہاکہ وزیراعظم الکاظمی نے سیکیورٹی اداروں کے بنیادی ڈھانچے میں تبدیلیوں کے احکامات دیئے ہیں۔عراقی داخلہ سیکرٹری داخلہ برائے انٹیلی جنس عامر صدام کو ان کے عہدے سے ہٹا دیا گیا ہے اور ان کی جگہ احمد ابو رغیف کو سیکرٹری داخلہ برائے انٹیلی جنس مقرر کیا گیا ہے۔
وزیراعظم نے وزارت داخلہ کے ڈائریکٹر جنرل برائے انٹیلی جنس عبدالکریم عبد فاجل کو بھی اس کے عہدے سے ہٹا دیا گیا۔ ان کی جگہ حمید الشطری کو مسلح افواج میں ڈائریکٹر جنرل برائے انٹیلی جنس مقرر کیا گیا ہے۔بغداد آپریشنز کمانڈ کے سربراہ قیس المحمداوی کو وزارت دفاع بلالیا گیا ہے۔فیڈرل پولیس چیف جعفر البطاط کو بھی ان کے عہدے سے ہٹا دیا گیا ہے اور ان کی جگہ میجر شاکر جود کو فیڈرل پولیس چیف مقرر کیا گیا ہے۔
انٹیلی جنس ڈائریکٹر اپریشنز بغداد باسم مجید کو بھی ان کے عہدے سے ہٹا دیا گیا ہے۔ٹوئٹر پر پوسٹ کردہ ایک بیان میں الکاظمی کا کہنا تھا کہ عراقی عوام کاخون بہانے والوں سے آہنی ہاتھوں سے نمٹا جائے گا۔ خیال رہے کہ بغداد میں گذشتہ روز ہونے والے خونی بم دھماکوں میں کم سے کم 32ا فراد ہلاک اور 110 زخمی ہو گئے تھے۔
