راستے بندکرکے مذاکرات کی دعوت اچھامذاق :اکھلیش یادو

لکھنو:(اردودنیا.اِن)اترپردیش کے قومی صدر اکھلیش یادونے منگل کے روزدہلی کی سرحدوں پر کسانوں کے احتجاج کے مقامات پر پولیس کے ذریعہ راستوں کو روکنے اور راستے بند کرنے پر بی جے پی حکومت پر حملہ کیا۔ منگل کے روز مرکزمیں بی جے پی حکومت پر حملہ کرتے ہوئے اکھلیش یادو نے کہاہے کہ ایک طرف کسانوں کو بات چیت کے لیے مدعوکیاجاتا ہے ،

دوسری طرف دہلی کی سرحدوں پر رکاوٹیں کھڑی کی جاتی ہیں۔ایک ٹویٹ میں یادو نے شاعرانہ اندازمیں کہاہے کہ سیاست بہت ہی اوچھی ہے۔راستے میں دیوار اٹھا دی ہے ، خار دار تار بچھاتے ہوئے کہاجاتاہے ، آؤ بات کریں۔در حقیقت ، مظاہرین کی نقل وحرکت کو روکنے کے لیے ،پولیس کی نگرانی میں ، کارکنوں نے سنگھو بارڈر پر مرکزی شاہراہ پر سیمنٹ بلاکرز کی دو قطار کے درمیان آہنی ڈنڈے ڈال رکھے ہیں۔

اس حصے میں دہلی، ہریانہ شاہراہ کے ایک اور حصے پر عارضی سیمنٹ کی دیواربنانے سے بھی جزوی طور پر رکاوٹ پیدا ہوئی ہے۔ دہلی غازی پور بارڈر پر بھی سیکیورٹی بڑھا دی گئی ہے جہاں کسان دوماہ سے زیادہ عرصے سے زرعی قوانین کے خلاف سراپا احتجاج ہیں۔