کورونا ویکسین کیخلاف دارالعلوم دیوبند کے نام سے منسوب فتویٰ فرضی : دارالعلوم دیوبند کی وضاحت

دارلعلوم دیوبند: 27/ڈسمبر (اردودنیا نیوز) کوروناوائرس (کوویڈ 19) کے سد باب کے لیے جس ویکسین کے ایجاد اور استعمال کیے جانے کے سلسلہ میں بیرون ممالک سے خبریں موصول ہورہی ہیں وہ ویکسین ابھی تک ہندوستان میں عمومی طور پر دستیاب نہیں ہے۔

 اس کے اجزائے ترکیبی کے سلسلہ میں بھی کوئی معتبر صراحت سامنے نہیں آئی ہے اس لیے اس ویکسین کے خلاف کوئی بیان یا فتوی دینا قبل از وقت ہے۔لیکن دارالعلوم دیوبند کی طرف منسوب کرتے ہوئے کورونا ویکسین کا استعمال حرام ہونے سے متعلق ایک فرضی فتوی میڈیا میں موضوعِ بحث بنا ہوا ہے۔ اس سلسلہ میں وضاحت کیجاتی ہیکہ کورونا ویکسین کی بابت جواز اور عدمِ جواز کا کوئی فتوی یا باضابطہ بیان دارالعلوم دیوبند کی جانب سے جاری نہیں کیا گیا ہے۔