شیلانگ:(اردودنیا.اِن)بڑھتی ہوئی کورونا انفیکشن کی وجہ سے ملک میں ہنگامہ برپا ہے۔ اب ہر عمر کے لوگوں میں کورونا وائرس پھیل رہا ہے،موت کے بڑھتے ہوئے اعدادوشمار مستقبل کی خراب صورتحال کی طرف اشارہ کررہے ہیں۔ ایک ہفتہ کے لئے ہندوستان کی متعدد ریاستوں میں لاک ڈاؤن نافذ کردیا گیا ہے اور توقع کی جارہی ہے کہ بڑھتے ہوئے معاملات میں اس میں معمولی کمی واقع ہوگی۔
اسی وجہ سے، میگھالیہ کے وزیر اعلی کونراڈ سنگما نے ایک اہم فیصلہ لیا ہے۔ انہوں نے ریاست میں موجود کووڈ 19 کا جائزہ لیا ہے، جس کے بعد انہوں نے 23 اپریل سے ریاست میں بین الاقوامی سیاحوں کے داخلے پر پابندی عائد کردی ہے۔ وزیراعلیٰ نے ٹویٹ کرکے یہ معلومات دی ہیں۔سنگما نے ایک ٹویٹ میں کہا ہے کہ میگھالیہ 23 اپریل 2021 سے بین الاقوامی سیاحوں کو ریاست میں داخل ہونے پر پابندی عائد کردی گئی ہے، حالانکہ مقامی سیاحت جاری رہے گی۔
انہوں نے یہ بھی کہا کہ شیلانگ کے تمام اسکول منگل سے 2 مئی تک بند رہیں گے۔ ریاستی حکومت نے سرکاری اور نجی دفاتر کو پچاس فیصد ملازمین کے ساتھ کام کرنے کی ہدایت کی ہے۔ نیز ریاست کے تمام اضلاع کی حالت پر گہری نظر رکھی جارہی ہے۔وہیں آر ٹی پی سی آر ٹیسٹ کے لئے وقت کی حد 72 سے گھٹ کر 48 گھنٹے کردی جائے گی۔
