گاندھی خاندان و منموہن سنگھ کے حفاظتی گھیرے کم کیے جانے پر خوشی منانے والی بی جے پی کی چیخ پکار چہ معنی دار: سچن ساونت

ممبئی :مہاراشٹرا میں نہایت ہی اہم شخصیات ( وی وی آئی پی) کو مہیا کی جانے والی ایکس، وائی اور زیڈ پلس کے بشمول دیگر تمام زمراجات کی حفاظتی ڈھال ( سیکیورٹی کور )کو ازسرنو ترتیب دے کر اس میں بڑے پیمانے پر تبدیلیاں کی گئی ہیں۔ ریاستی وی وی آئی پی سیکیورٹی کے سالانہ جائزہ کے بعد ، مہا وکاس اگھاڑی حکومت نے بہت سی اہم شخصیات کے حفاظتی ڈھال کے زمروں میں تبدیلی کر کے یا تو اسے کم کر دیا ہے یا مکمل طور پر ختم کر دیا ہے۔ جبکہ سینئر رہنما اور راشٹر وادی کانگریس پارٹی کے صدر شرد پوار کی خواہیش پر آج اتوار کو انکے حفاظتی گھیرے میں کمی کی گئی ہے۔

حزب اختلاف کے قائد اور بھارتیہ جنتا پارٹی کے سابق وزیر اعلیٰ دیویندر فڈنویس اور پروین ڈیریکر سمیت متعدد رہنماؤں کے حفاظتی گھیرے کو کم کردیا گیا ہے جبکہ ریاستی بی جے پی صدر چندرکانت پاٹل سمیت دیگر رہنماؤں کو دی جانے والی سیکیورٹی کو واپس لے لیا گیا ہے۔ اس ضمن میں جیسے ہی بی جے پی نے گریہ و زاری شروع کی تو شرد پوار نے وزیر داخلہ انیل دیشمکھ سے درخواست کی کہ وہ ان کے حفاظتی گھیرے کو کم کردیں۔

اپنی سیکیورٹی واپس لیے جانے سے ناراض، سابق وزیر اور بی جے پی کے سینئر رہنما سدھیر منگینٹیور نے حکومت پر تنقید کرتے ہوئے کہا کہ

"مجھے سیکیورٹی اس لئے دی گئی تھی کہ میں ماؤنواز زدہ ضلع سے ہوں۔ اسے واپس لے لیا گیا ہے ، لہذا ایسا لگتا ہے کہ ماؤنواز سرگرمیاں ختم ہوگئیں۔ لیکن (حکومت) کو عام عوام کی سلامتی کو یقینی بنانا ہوگا۔
کانگریس کے ترجمان سچن ساونت نے سوال کیا کہ اگر بی جے پی قائدین کو لاحق خطرات کی کمی کے باعث ان کی حفاظتی گھیرے کو کم یا ہٹا دیا گیا ہے تو وہ کیوں چیخیں مار رہےہیں۔ "اگرچہ گاندھی خاندان اور سابق وزیر اعظم منموہن سنگھ کو دھمکیوں اور خطرات کا سامنا ہے اس کے باوجود بی جے پی نے صریحا ان کے حفاظتی انتظامات کو کم کردیا تھا اور اس پر بی جے پی کے لوگوں نے خوشی منائی… لیکن مہا وکاس اگھاڑی حکومت اس طرح کا رویہ اختیار نہیں کرتی ہے ۔” اسی طرح دیشمکھ اور دیگر کانگریسی رہنماؤں نے اس بات کی نشاندہی کی کہ ، 2014 کے آخر میں اقتدار میں آنے کے فوراً بعد ، فڈنویس نے شرد پوار اور اشوک چوان سمیت متعدد رہنماؤں کی سیکیورٹی کو کم کردیا تھا