کشمیر : دَم گھٹنے سے ایک ہی خاندان کے پانچ افراد کی المناک موت

سری نگر،6جنوری:(اردودنیا.اِن/ایجنسیز) جموں و کشمیر کے گرمائی دارالحکومت سری نگر میں کل رات دم گھٹنے سے ایک ہی خاندان کے پانچ افراد کی موت ہو گئی۔ بتایا جا رہا ہے کہ متاثرہ کے گھر والے کمرے میں ہیٹر چلا کر سو گئے تھے، وہ سب کرائے کے مکان میں رہتے تھے۔ جاں بحق افراد کی نعشوں کو پوسٹ مارٹم کے لیے بھیج دیا گیا ہے۔ پولیس واقعے کی تحقیقات میں مصروف ہے۔حکام کے مطابق مرنے والوں میں والدین اور ان کے دو کمسن بچے اور 28 روز قبل پیدا ہونے والا ایک شیر خوار بچہ بھی شامل ہے۔ خاندان کے اہم رکن والد کی شناخت اعجاز احمد بٹ کے طور پر ہوئی ہے۔ وہ ایک نجی ہوٹل للت گرینڈ پیلس میں شیف کی ملازمت پر تھے۔

وہ اصل میں بارہمولہ ضلع کے اُڑی کے رہنے والے تھے، لیکن گزشتہ دو ماہ سے یہاں کرائے کے مکان میں مقیم تھے ۔مکان مالک مختار احمد نے انکشاف کیا کہ انہیں متاثرہ اعجاز بٹ کی والدہ نے آگاہ کیا تھا۔ وہ اپنے بیٹے سے رابطہ نہیں کر پا رہی تھی۔ مختار نے کہاکہ اس نے مجھے فون کیا اور بتایا کہ اعجاز شام 4 بجے سے ان کے فون کا جواب نہیں دے رہے تھے۔ میں نے ایک اور کرایہ دار کو ان سے ملنے کے لیے بھیجا۔مختار نے کہاکہ جب کرایہ دار نے دروازہ کھٹکھٹایا اور کوئی جواب نہ ملا تو ہم نے زبردستی دروازہ کھولا اور اعجاز، اس کی بیوی اور ان کے تین بچوں کو مردہ پاکر حیران رہ گئے ۔ وادی کی سرد ترین راتوں میں حرارتی آلات کے استعمال نے حفاظتی خدشات کو جنم دیا ہے۔