پشپک ایکسپریس میں المناک حادثہ,آتشزدگی کی افواہ کے بعد چلتی ٹرین سے مسافروں نے لگائی چھلانگ،9ہلاک

ممبئی ،22جنوری :(اردودنیا.اِن/ایجنسیز) مہاراشٹر کے جلگ اؤں کے پرانڈا ریلوے اسٹیشن پر بدھ (22 جنوری) کو ایک بڑا حادثہ پیش آگیا۔ پشپک ایکسپریس میں آگ لگنے کی افواہ کے بعد یہاں بھگدڑ مچ گئی۔ جس کے بعد آگ لگنے کے خوف سے مسافروں نے پشپک ایکسپریس سے چھلانگ لگا دی۔ اس کے بعد دوسرے ٹریک سے گزرنے والی کرناٹک ایکسپریس نے چھلانگ لگانے والے مسافروں کو کچل دیا۔کئی مسافروں کے زخمی ہونے کی خبر ہے جبکہ 8سے10 مسافروں کی موت کی بھی خبر مل رہی ہے،لیکن ابھی تک اس کی تصدیق نہیں ہوسکی ہے۔

یہ ٹرین لکھنؤ سے ممبئی جارہی تھی۔واضح رہے کہ یہ واقعہ ممبئی جانے والی پشپک ایکسپریس کے جل گاؤں اور پرانڈا اسٹیشنوں کے درمیان پیش آیا، مسافروں نے بتایا کہ لوگ ٹرین سے اس وقت کود نے لگے، جب ٹرین میں آگ لگنے کی افواہ پھیل گئی۔ لوگ اچانک سے ٹرین سے کود کر بھاگنے لگے،اور اسی دوران دوسری ٹرین بھی دوسری ٹریک پر آگئی۔یہ حادثہ بدھ کو مہاراشٹر کے جلگاؤں کے پرانڈا ریلوے اسٹیشن پر پیش آیا۔

دوسرے ٹریک پر آنے والی ٹرین نے کئی لوگوں کو کچل دیا۔ اس حادثے میں 8 سے 10افراد کے ہلاک ہونے کی اطلاعات ہیں۔جل گاؤں ٹرین حادثے میں 40 لوگوں کے زخمی ہونے کی اطلاع ہے۔ اطلاعات کے مطابق زخمیوں کا ابھی تک علاج نہیں ہوسکا ہے۔ موقع پر کوئی طبی سہولت دستیاب نہیں تھی۔