چینائی میں اے ٹی ایم چوری کرنے والا گروہ بے نقاب، اتر پردیش کے تین افراد گرفتار

چینائی (تمل ناڈو): ترووانمیور کے علاقے میں اسٹیٹ بینک آف انڈیا (SBI) کے اے ٹی ایم میں مشکوک سرگرمیوں کی اطلاع پر پولیس نے بروقت کارروائی کرتے ہوئے ایک چوری کی کوشش کو ناکام بنا دیا۔ واردات میں ملوث ایک گروہ کے تین ارکان کو گرفتار کر لیا گیا ہے، جن کا تعلق ریاست اتر پردیش سے ہے، جبکہ دیگر ملزمان کی تلاش جاری ہے۔

تفصیلات کے مطابق 34 سالہ نریندر کمار، جو ایک نجی کمپنی ہٹاچی کے اے ٹی ایم سروس سینٹر میں کام کرتے ہیں، کو ممبئی میں واقع کمپنی کے دفتر سے اطلاع ملی کہ تروولّور نگر میں نصب اے ٹی ایم مشین میں تکنیکی خرابی پائی گئی ہے۔ اطلاع کے بعد نریندر کمار موقع پر پہنچے، جہاں ابتدائی معائنے کے دوران انہوں نے نقد رقم نکالنے والی جگہ پر ایک سیاہ اسٹیکر چسپاں پایا۔

نریندر نے فوراً جے-6 پولیس اسٹیشن سے رابطہ کر کے شکایت درج کرائی۔ پولیس نے معاملے کی سنگینی کو دیکھتے ہوئے دو خصوصی ٹیمیں تشکیل دیں، جنہوں نے جائے وقوعہ اور اطراف کی سی سی ٹی وی فوٹیج کا بغور جائزہ لیا۔ تحقیقات کے بعد پولیس نے تین افراد — کلدیپ سنگھ، برج بھان، اور سمت یادو — کو گرفتار کر لیا، جو سبھی اتر پردیش کے رہائشی ہیں۔

پولیس کے بیان کے مطابق، یہ گروہ اے ٹی ایم مشینوں کو کھولنے کے لیے نقلی چابیاں استعمال کرتا تھا۔ وہ مشین کی نقدی نکالنے والی جگہ پر سیاہ اسٹیکر چپکا کر مشین کو خراب ظاہر کرتے تھے۔ جب کوئی صارف مشین چھوڑ دیتا، تو یہ افراد موقع کا فائدہ اٹھاتے ہوئے مشین کھول کر نقد رقم چرا لیتے۔

مزید یہ کہ یہ گروہ عموماً ہفتہ و اتوار کو سرگرم ہوتا، تاکہ بینک اسٹاف کی غیر موجودگی میں واردات آسانی سے انجام دی جا سکے۔ وہ موبائل ایپس کے ذریعے ٹیکسی بُک کر کے جائے واردات پر پہنچتے اور واردات کے بعد فوراً ریاست اتر پردیش کی طرف روانہ ہو جاتے۔

پولیس نے ان کے قبضے سے نقلی چابیاں، سیاہ اسٹیکر، اور ڈبل سائیڈ ٹیپ بھی برآمد کی ہیں۔ مقدمے کی تفتیش جاری ہے، اور پولیس مزید ملزمان کی تلاش میں چھاپے مار رہی ہے۔