رمضان میں کرناٹک کے اردو اسکولوں کے اوقات تبدیل، حکومت کا اہم فیصلہ

حیدرآباد 02 فروری:(اردودنیا.اِن/ایجنسیز)کرناٹک حکومت نے ماہ رمضان کے پیش نظر ریاست بھر کے اردو میڈیم اسکولوں کے اوقات کار میں تبدیلی کا فیصلہ کیا ہے۔ یہ تبدیلی اردو میڈیم اسکولوں پر لاگو ہوگی۔ ریاست کے وزیر داخلہ جی پرمیشورا نے پیر کو واضح کیا کہ اس فیصلے کو اقلیتوں کی خوشنودی قرار دینا درست نہیں ہے۔

حکومت کی جانب سے جاری سرکلر کے مطابق یہ حکم تمام سرکاری، امداد یافتہ اور غیر امدادی اردو میڈیم اسکولوں پر نافذ ہوگا۔ سرکلر میں کہا گیا ہے کہ یہ فیصلہ موجودہ احکامات اور کرناٹک اسٹیٹ پرائمری اسکول ایجوکیشن ایسوسی ایشن کی نمائندگی کا جائزہ لینے کے بعد کیا گیا ہے۔

30 جنوری کو جاری سرکلر، جو پیر کو عام کیا گیا، میں بتایا گیا کہ 31 اکتوبر 2002 کے اسٹینڈنگ آرڈر کے تحت اردو میڈیم اسکولوں کو صبح 8 بجے سے دوپہر 12 بج کر 45 منٹ تک کلاسیں چلانے کی اجازت تھی۔ حکومت نے اس پر نظر ثانی کرتے ہوئے نئے حالات کے مطابق قدم اٹھایا ہے۔

رپورٹ کے مطابق حکومت نے 8 مارچ 2023 کے حکم نامے کا بھی حوالہ دیا، جس کے تحت تعلیمی سال 2023-24 کے لیے اسکولوں کے باقاعدہ اوقات صبح 10 بجے سے شام 4 بج کر 20 منٹ تک مقرر کیے گئے تھے۔ تاہم رمضان کے دوران اردو میڈیم اداروں کے لیے خصوصی رعایت کو مدنظر رکھتے ہوئے 17 جنوری 2026 کو پیش کی گئی نمائندگی کے بعد اس معاملے کا ازسرنو جائزہ لیا گیا۔

حکم نامے میں کہا گیا ہے کہ تعلیمی سال 2025-26 میں رمضان کے آغاز سے 20 مارچ 2026 تک ریاست کے تمام اردو میڈیم اسکولوں میں تبدیل شدہ اوقات نافذ رہیں گے۔ وزیر داخلہ جی پرمیشورا نے کہا کہ اس اقدام کا مقصد اردو میڈیم کے طلبہ کو دوسرے بچوں کے برابر مواقع فراہم کرنا ہے۔

انہوں نے سماجی مساوات کی ضرورت پر زور دیتے ہوئے کہا کہ آئین نے پسماندہ طبقات کے لیے خصوصی تحفظات اسی لیے فراہم کیے تاکہ وہ بھی ترقی کی دوڑ میں برابر شریک ہو سکیں۔ ان کے مطابق اسکول کے اوقات میں تبدیلی ایک چھوٹا قدم ضرور ہے، مگر اس کا مقصد سب کو مساوی مواقع فراہم کرنا ہے۔