سوتیلی کمسن بیٹی سے زیادتی، میرٹھ عدالت نے ملزم کو 20 سال قید کی سزا سنائی

میرٹھ 23 مئی:(اردودنیا.اِن/ایجنسیز) اتر پردیش کے میرٹھ میں پوکسو عدالت نے اپنی 10 سالہ سوتیلی بیٹی سے زیادتی کے معاملہ میں ایک شخص کو 20 سال قید با مشقت کی سزا سنائی ہے۔ عدالت نے مجرم پر 7 ہزار روپے جرمانہ بھی عائد کیا۔

استغاثہ کے مطابق ایڈیشنل ڈسٹرکٹ جج (پوکسو ایکٹ) محمد بابر خان کی عدالت نے جمعہ کو سنائے گئے فیصلے میں انچولی تھانہ علاقہ کے بیٹا گاؤں کے رہنے والے ونود کو قصوروار قرار دیا۔ متاثرہ بچی واردات کے وقت محض 10 سال کی تھی۔

سرکاری وکیل نے عدالت کو بتایا کہ یہ معاملہ 29 ستمبر 2021 کو سامنے آیا تھا، جب متاثرہ بچی کی ماں نے نوچندی تھانے میں شکایت درج کرائی۔ شکایت میں الزام لگایا گیا تھا کہ ملزم نے گھر میں اکیلی موجود اپنی سوتیلی بیٹی کو نشانہ بنایا اور اس کے ساتھ زیادتی کی۔

خاتون کے مطابق بعد میں بچی نے اپنی ماں کو پوری بات بتائی، جس کے بعد پولیس سے رجوع کیا گیا۔ پولیس نے مقدمہ درج کرکے متاثرہ بچی کا طبی معائنہ کرایا اور مختلف شواہد اکٹھا کئے۔

جانچ مکمل ہونے کے بعد پولیس نے عدالت میں چارج شیٹ داخل کی، جس کے بعد مقدمہ کی سماعت شروع ہوئی۔ سماعت کے دوران استغاثہ نے متاثرہ بچی، اس کی ماں اور دیگر گواہوں کے بیانات عدالت کے سامنے پیش کئے۔

عدالت نے تمام شواہد اور گواہوں کے بیانات کا جائزہ لینے کے بعد ملزم کو قصوروار قرار دیتے ہوئے 20 سال قید با مشقت کی سزا سنائی۔ عدالت نے اپنے فیصلے میں کمسن بچوں کے خلاف جرائم کو سنگین قرار دیتے ہوئے سخت سزا کی ضرورت پر زور دیا۔