خواتین کیلئے ایواکاڈو کا استعمال-حفصہ فاروق بنگلور
ایواکاڈو کے حیرت انگیز فوائد
ایواکاڈو غذائیت سے بھرپور پھل ہے جو صحت مند چکنائیوں، وٹامنز اور اینٹی آکسیڈنٹس کا بہترین ذریعہ سمجھا جاتا ہے۔ یہی وجہ ہے کہ اسے جلد کی نگہداشت، بالوں کی مضبوطی اور مجموعی صحت کے لیے قدرتی نعمت قرار دیا جاتا ہے۔ ایواکاڈو کو مختلف طریقوں سے استعمال کرکے جلد کو نمی، بالوں کو مضبوطی اور جسم کو توانائی فراہم کی جاسکتی ہے۔
ایواکاڈو فیس ماسک
ایواکاڈو اور شہد کا امتزاج جلد کیلئے قدرتی موئسچرائزر کا کام کرتا ہے۔ اس ماسک میں جراثیم کش اور اینٹی آکسیڈنٹ خصوصیات موجود ہوتی ہیں جو جلد کو نرم، تروتازہ اور چمکدار بنانے میں مدد دیتی ہیں۔ خشک جلد رکھنے والی خواتین ہفتے میں ایک مرتبہ اس ماسک کا استعمال کرسکتی ہیں۔
اجزاء
- آدھا پکا ہوا ایواکاڈو
- ایک چائے کا چمچ لیموں کا رس
- ایک کھانے کا چمچ زیتون کا تیل
- ایک کھانے کا چمچ جو
- ایک کھانے کا چمچ شہد
- ایک انڈے کی سفیدی
طریقہ استعمال
تمام اجزاء کو اچھی طرح مکس کریں اور چہرے پر لگائیں۔ 15 منٹ بعد نیم گرم پانی سے دھولیں۔ جلد نرم، ملائم اور نمی سے بھرپور محسوس ہوگی۔
ایواکاڈو ہیئر ماسک
ایواکاڈو اور انڈے کی زردی سے تیار کردہ ہیئر ماسک بالوں کو مضبوط بنانے اور ٹوٹنے سے بچانے میں مدد دیتا ہے۔ وٹامن ای، ڈی اور بی 6 بالوں کی جڑوں کی حفاظت کرتے ہیں جبکہ لیونڈر آئل خشکی اور خارش کے مسائل کم کرنے میں معاون ثابت ہوسکتا ہے۔
اجزاء
- آدھا پکا ہوا ایواکاڈو
- ایک انڈے کی زردی
- چند قطرے لیونڈر آئل
طریقہ استعمال
تمام اجزاء کو بلینڈر میں اچھی طرح مکس کریں۔ بالوں پر لگائیں اور 20 منٹ بعد شیمپو اور کنڈیشنر سے دھولیں۔ بہتر نتائج کیلئے بالوں کو قدرتی ہوا میں خشک ہونے دیں۔
ایواکاڈو اسموتھی
ایواکاڈو اور بلو بیریز سے تیار کردہ اسموتھی اینٹی آکسیڈنٹس، فائبر اور صحت مند چکنائیوں سے بھرپور ہوتی ہے۔ یہ جسم میں موجود نقصان دہ مادوں کے اخراج اور جلد کی تازگی برقرار رکھنے میں مددگار ثابت ہوسکتی ہے۔
اجزاء
- ایک پکا ہوا ایواکاڈو
- آدھا کیلا
- ایک کپ ناریل کا دودھ
- ایک کپ تازہ پالک
- ایک کپ فروزن بلو بیریز
- آدھا کپ تخم بالنگا
طریقہ تیاری
تمام اجزاء کو بلینڈر میں اچھی طرح مکس کریں۔ یہ اسموتھی دو افراد کیلئے کافی ہوتی ہے اور ورزش کے بعد بہترین مشروب ثابت ہوسکتی ہے۔
ایواکاڈو بیج کی چائے
ایواکاڈو کے بیج میں اینٹی آکسیڈنٹ اور سوزش کے خلاف خصوصیات پائی جاتی ہیں۔ بعض افراد اسے ہاضمے کی بہتری کے لیے استعمال کرتے ہیں۔
اجزاء
- ایواکاڈو کا بیج
- ایک کپ اُبلتا ہوا پانی
طریقہ تیاری
بیج کو پیس کر اُبلتے پانی میں شامل کریں۔ تین سے چار منٹ تک پکائیں، پھر چھان کر چائے کی طرح استعمال کریں۔
احتیاط
اگر آپ کو کسی غذا یا قدرتی اجزاء سے الرجی ہے تو ان نسخوں کے استعمال سے قبل ماہرِ جلد یا طبی ماہر سے مشورہ ضرور کریں
