الیکشن کمیشن کا ووٹر لسٹوں پر خصوصی نظرثانی کا شیڈول جاری، حتمی فہرست 21 جنوری 2027 کو ہوگی شائع

نئی دہلی، 5 نومبر (اردو دنیا نیوز/ایجنسیز) الیکشن کمیشن نے ووٹر لسٹوں میں نئے اور اہل ووٹرس کے نام شامل کرنے کے لیے خصوصی نظرثانی (Special Summary Revision) کا تفصیلی شیڈول جاری کردیا ہے۔ اس مہم کا مقصد ان نوجوانوں اور پہلی مرتبہ ووٹ ڈالنے کے اہل شہریوں کو انتخابی فہرستوں میں شامل کرنا ہے، جن کے نام اب تک ووٹر لسٹ میں درج نہیں ہوسکے ہیں۔ کمیشن کے مطابق حتمی انتخابی فہرست 21 جنوری 2027 کو شائع کی جائے گی۔

الیکشن کمیشن آف انڈیا کی جانب سے جاری بیان کے مطابق انتخابی فہرستوں کا مربوط مسودہ (Integrated Draft Electoral Rolls) 30 نومبر 2026 تک تیار کرلیا جائے گا۔ اس کے بعد شہریوں کو اپنے نام، پتے اور دیگر تفصیلات کی جانچ کرنے اور ضرورت پڑنے پر اعتراضات و دعوے داخل کرنے کا موقع دیا جائے گا۔

کمیشن نے بتایا کہ یہ خصوصی نظرثانی ان ریاستوں اور مرکز کے زیر انتظام علاقوں میں مرحلہ وار انجام دی جائے گی جہاں اسپیشل انٹینسو ریویژن (SIR) کا عمل مکمل ہوچکا ہے یا اس کا تیسرا مرحلہ جاری ہے۔ اس لیے یہ مہم ملک بھر میں ایک ساتھ شروع نہیں کی جائے گی۔

الیکشن کمیشن کے مطابق آندھرا پردیش، ہریانہ، جھارکھنڈ، کرناٹک، مہاراشٹر، میگھالیہ، ناگالینڈ، قومی دارالحکومت دہلی، تریپورہ اور تلنگانہ میں خصوصی نظرثانی کے شیڈول کا اعلان بعد میں کیا جائے گا۔

اسی طرح ہماچل پردیش، جموں و کشمیر اور لداخ جیسے سرد اور پہاڑی علاقوں میں موسمی حالات کو مدنظر رکھتے ہوئے ووٹر لسٹوں کی نظرثانی کا عمل بعد کے مرحلے میں شروع کیا جائے گا۔

کمیشن کے جاری کردہ شیڈول کے مطابق پولنگ اسٹیشنوں کی تعداد اور مقامات کو معقول بنانے اور ضرورت کے مطابق ان کی ترتیب میں تبدیلی کا عمل 20 نومبر 2026 تک مکمل کیا جائے گا، جبکہ انتخابی فہرستوں کا مربوط مسودہ 30 نومبر تک شائع کیا جائے گا۔

ووٹر لسٹوں سے متعلق دعوے اور اعتراضات داخل کرنے کے لیے 30 نومبر سے 12 دسمبر 2026 تک کا وقت مقرر کیا گیا ہے۔ اس دوران شہری اپنے نام کے اندراج، تفصیلات میں اصلاح یا دیگر متعلقہ معاملات کے لیے درخواست دے سکیں گے۔ موصول ہونے والے تمام دعووں اور اعتراضات کی یکسوئی 16 جنوری 2027 تک مکمل کرنے کی ہدایت دی گئی ہے۔

الیکشن کمیشن نے واضح کیا کہ تمام مراحل مکمل ہونے کے بعد حتمی انتخابی فہرست 21 جنوری 2027 کو شائع کردی جائے گی۔

کمیشن نے بوتھ لیول آفیسرز (BLOs)، ڈسٹرکٹ الیکشن آفیسرز (DROs)، الیکٹورل رجسٹریشن آفیسرز (EROs) اور دیگر متعلقہ انتخابی عہدیداروں کے لیے بھی تفصیلی رہنما ہدایات جاری کی ہیں۔ ریاستوں کے چیف الیکٹورل آفیسرز (CEOs) کو ہدایت دی گئی ہے کہ وہ انتخابی فہرستوں کی اشاعت کے عمل کے دوران عوام اور سیاسی جماعتوں کو مسلسل معلومات فراہم کریں۔

ہدایت کے مطابق چیف الیکٹورل آفیسرز ہفتہ وار موصول ہونے والے دعووں اور اعتراضات کی فہرست سیاسی جماعتوں کے حوالے کرنے کے عمل کی تصاویر بھی جاری کریں گے۔ اس کے ساتھ عوام کو یہ بھی بتایا جائے گا کہ انتخابی حکام کے فیصلوں سے غیر مطمئن افراد اپیل کس طرح داخل کرسکتے ہیں۔

الیکشن کمیشن نے 29 ستمبر کو بھی کم از کم 20 ریاستوں اور مرکز کے زیر انتظام علاقوں میں خصوصی مہم چلانے کی ہدایات جاری کی تھیں، جس کا مقصد ووٹر لسٹوں سے محروم رہ جانے والے نوجوانوں اور پہلی مرتبہ ووٹ ڈالنے کے اہل شہریوں کا اندراج یقینی بنانا تھا۔ اب نظرثانی کے شیڈول کے اعلان کے ساتھ اس مہم کے باضابطہ عمل کا آغاز ہوگیا ہے۔