مہاراشٹر: 13 سالہ بچی کو ہوس کا نشانہ بنانے والے شخص پر مقدمہ، حاملہ ہونے پر کھلاتھا معاملہ

تھانے، 29 اپریل :(اردودنیا.اِن/ایجنسیاں)مہاراشٹر کے تھانے میں 13 سالہ لڑکی کے ساتھ زیادتی کا معاملہ سامنے آیا ہے۔ بتایا جا رہا ہے کہ یہ معاملہ اس وقت سامنے آیا جب متاثرہ لڑکی حاملہ ہو گئی۔ اس معاملے میں پولیس نے ملزم کے خلاف مقدمہ درج کر لیا ہے۔ پولیس کے مطابق ملزم کے خلاف کاسرواداولی پولیس اسٹیشن میں پاکسو ایکٹ اور عصمت دری سمیت مختلف دفعات کے تحت مقدمہ درج کیا گیا ہے۔

پولیس حکام نے بتایا کہ ملزم کی شناخت 30 سالہ شخص کے طور پر ہوئی ہے۔ وہ گھوڈبندر روڈ کا رہنے والا ہے اور تقریباً تین سال سے متاثرہ خاندان کے گھر میں کام کر رہا تھا۔ بتایا جا رہا ہے کہ ملزم نے متاثرہ کو اس وقت زیادتی کا نشانہ بنایا جب وہ گھر میں اکیلی تھی۔بتایا جا رہا ہے کہ چند روز قبل متاثرہ نے پیٹ میں درد کی شکایت کی تھی جس کے بعد اسے ہسپتال لے جایا گیا تھا۔

جانچ کرنے پر معلوم ہوا کہ وہ تین ماہ کی حاملہ تھی۔ اس کے بعد متاثرہ نے اپنے ساتھ ہونے والی زیادتی کا واقعہ سنایا اور بتایا کہ اس کے ساتھ کئی بار زیادتی کی گئی۔ لواحقین نے معاملے کی اطلاع پولیس کو دی جس کے بعد ملزم کے خلاف مقدمہ درج کر لیا گیا۔ ملزم گرفتار نہیں ہوسکا ۔