گجرات میں پاکستان کو خفیہ معلومات بھیجنے کے الزام میں نیلیش نامی شخص گرفتار

احمد آباد، 8جولائی:(اردودنیانیوز.کام/ایجنسیز) گجرات اے ٹی ایس نے آئی ایس آئی ISI کے لیے جاسوسی کرنے کیلئے نیٹ ورک کا پردہ فاش کیا ہے۔ اس کارروائی میں اے ٹی ایس نے ایک ایسے شخص کو گرفتار کیا ہے جو پاکستان کے لیے جاسوسی کر رہا تھا۔ اس کا نام نیلیش والیا بتایا گیا،جو مذہبا ً ہندو ہے۔گجرات اے ٹی ایس کے مطابق اس شخص نے ہنی ٹریپ ہونے کے بعد پاکستان کو خفیہ معلومات شیئر کی ہیں۔ معلومات دینے کے عوض میں اس نے 25 ہزار روپے بھی وصول کیے ہیں۔ اس نیٹ ورک کے تار یوپی تک بھی پھیلے ہیں اور گجرات اے ٹی ایس کے ان پٹ پر یوپی اے ٹی ایس نے بھی ریاست میں جانچ شروع کر دی ہے۔

اس معاملے کی جانچ میں اے ٹی ایس کو پتہ چلا کہ نیلیش پاکستان سے ہینڈلر کے ساتھ ادیتی کے نام پر فرضی پروفائل کے ذریعے رابطہ میں آیا تھا۔ اس کے بعد اس نے بی ایس ایف سے متعلق کئی اہم معلومات آئی ایس آئی کو بھیجیں۔ اس کے بدلے میں اسے 25 ہزار روپے بھی دیے گئے۔ اے ٹی ایس اس معاملے میں گرفتار ملزم سے پوچھ گچھ کر رہی ہے۔ اس دوران کئی اہم معلومات بھی سامنے آئی ہیں۔گجرات اے ٹی ایس حکام کا کہنا ہے کہ ملزم کے موبائل کی ایف ایس ایل رپورٹ سے کئی تفصیلات سامنے آئی ہیں۔ اس سے پوچھ گچھ جاری ہے اور کچھ بڑے انکشافات بھی ہو سکتے ہیں۔گجرات اے ٹی ایس کو جاسوسی کے پورے نیٹ ورک میں آئی ایس آئی کے ملوث ہونے کا شبہ ہے۔ گجرات اے ٹی ایس نے چند روز قبل دہشت گردوں کے نیٹ ورک کو تباہ کر کے آئی ایس کے ہندوستانی ماڈیول کو بے نقاب کیا تھا۔