دہلی شراب گھوٹالہ کیس ای ڈی نے سنجے سنگھ کے 2 قریبی ساتھیوں کو بھیجا سمن، پوچھ گچھ کیلئے کیا طلب

نئی دہلی، 6اکتوبر :(اردودنیانیوز.کام/ایجنسیز) ای ڈی نے عام آدمی پارٹی کے رہنما اور راجیہ سبھا ممبر پارلیمنٹ سنجے سنگھ کے قریبی لوگوں کو دہلی شراب پالیسی معاملے میں پوچھ گچھ کے لیے بلایا ہے۔ گرفتار AAP لیڈر کے قریبی سمجھے جانے والے وویک تیاگی اور سرویش مشرا آج ای ڈی کے سامنے پیش ہوں گے۔ ای ڈی نے جمعرات کو سرویش مشرا کا نام لیا تھا کیونکہ اس نے دہلی شراب پالیسی کیس کی تحقیقات کے سلسلے میں سنگھ کی تحویل کی درخواست کی تھی۔ مرکزی تفتیشی ایجنسی کے مطابق سرویش کو سنجے سنگھ سے ایک کروڑ روپے ملے تھے۔آپ کو بتا دیں کہ کچھ دن پہلے ای ڈی نے سرویش مشرا اور وویک تیاگی کے گھروں پر بھی چھاپہ مارا تھا۔ اس دوران کچھ دستاویزات اور موبائل فون برآمد ہوئے۔شراب گھوٹالے کے ملزم دنیش اروڑہ کی گواہی کے بعد ای ڈی نے سنجے سنگھ کو گرفتار کیا تھا۔ ای ڈی نے اپنی چارج شیٹ میں الزام لگایا تھا کہ دنیش اروڑہ نے دہلی کے وزیر اعلی اروند کیجریوال سے ان کی رہائش گاہ پر ملاقات کی تھی۔ اس میٹنگ میں سنجے سنگھ بھی موجود تھے۔

دنیش اروڑا نے سنجے سنگھ پر کروڑوں روپے دینے کا بھی الزام لگایا ہے۔ گزشتہ جمعرات کو دہلی کی راؤس ایونیو کورٹ نے سنجے سنگھ کو 5 دن کے لیے ای ڈی ریمانڈ پر بھیج دیا۔ ای ڈی نے عدالت میں بتایا کہ دنیش اروڑہ نے سنجے سنگھ کو ان کے گھر پر دو قسطوں میں دو کروڑ روپے دیے تھے۔ اس دوران ای ڈی نے سرویش کا نام لیا۔ ای ڈی کے وکیل نے کہا تھا کہ رشوت کی رقم سرویش مشرا نے اپنی طرف سے سنجے سنگھ کے گھر پر لی تھی۔ذرائع نے بتایا کہ دنیش اروڑہ کے دعوؤں کی جانچ کے لیے ای ڈی اب سنجے سنگھ کو سرویش مشرا اور وویک تیاگی کے سامنے بٹھا کر تینوں سے پوچھ گچھ کر سکتی ہے۔ تحقیقاتی ایجنسی ای ڈی کا دعویٰ ہے کہ وویک تیاگی جو سنجے سنگھ کے پی اے تھے، کو ملزم امیت اروڑہ کی کمپنی میں حصہ داری دی گئی تھی۔