ممبئی: ( اردودنیا.اِن )ایلگر پریشد معاملے میں بمبئی ہائی کورٹ نے پیر کے روز میڈیکل کی بنیاد پر شاعر ورورا راؤ کی 6 ماہ کی عبوری ضمانت منظور کرلی ہے۔ عدالت نے انہیں ممبئی میں ہی رہنے کی ہدایت کی ہے اور جب بھی تفتیش کے لئے ان کی ضرورت پڑے ، وہ موجود رہیں۔
واضح رہے کہ این آئی اے اس معاملے کی تحقیقات کر رہی ہے۔ گزشتہ سماعت میں ماؤنوازوں کے مابین تعلقات کے سلسلے میں گرفتار ورورا راؤ کی وکیل اندرا جے سنگھ نے بامبے ہائی کورٹ کو اپنے مؤکل کی صحت سے متعلق آگاہ کیا تھا اور عبوری ضمانت کی درخواست کی تھی۔
انہوں نے بتایا تھا کہ کارکن شاعر فروری 2020 سے ابھی تک کل 365 دن میں سے ، 149 دن اسپتال میں رہے ہیں۔ واضح رہے کہ یہ معاملہ 1 جنوری 2018 کو پونے کے قریب کوریگاؤں کی جنگ کی 200 ویں سالگرہ کے جشن کے بعد ہونے والے تشدد سے متعلق ہے ، جس میں ایک شخص ہلاک اور متعدد افراد زخمی ہوئے تھے۔
