سابق پولیس کمشنر اے کے خان کے بیٹے محسن خان پر فلم ساز سے 50 لاکھ کی دھوکہ دہی اور تشدد کا مقدمہ درج

حیدرآباد:(اردودنیا.اِن/ایجنسیز) سابق حیدرآباد پولیس کمشنر اے کے خان کے بیٹے محسن خان اور ان کے ساتھی تبریز کے خلاف ایک فلم ساز سے 50 لاکھ روپے کی مبینہ دھوکہ دہی اور تشدد کرنے کے الزام میں مقدمہ درج کیا گیا ہے۔

پولیس کے مطابق، محسن خان، جو کانگریس رہنما شبیر علی کے داماد بھی ہیں، کے خلاف جوبلی ہلز پولیس اسٹیشن میں مقدمہ درج کیا گیا۔

شکایت کنندہ فلم ساز وینکٹ انیش ریڈی نے پولیس کو بتایا کہ وہ اپنی فلم "مہاراگنی” کے لیے پروڈیوسر اور سرمایہ کاروں کی تلاش میں جوبلی ہلز میں واقع سن لِٹ گروپ کے دفتر پہنچے تھے، جہاں ان کی ملاقات محسن خان اور تبریز سے ہوئی۔

ریڈی کے مطابق، محسن خان نے سرمایہ کاروں سے متعارف کرانے کا وعدہ کرتے ہوئے اگست 2025 میں ان سے 25 لاکھ روپے لیے، جبکہ تبریز کو بھی اسی مقصد کے لیے تین قسطوں میں مزید 25 لاکھ روپے ادا کیے گئے۔

فلم ساز کا الزام ہے کہ دونوں ملزمان نے نہ تو کسی سرمایہ کار سے ملاقات کرائی اور نہ ہی رقم واپس کی، بلکہ ہر بار مختلف بہانے بناتے رہے۔

شکایت کے مطابق، یکم جولائی کو جب وہ دوبارہ رقم کی واپسی یا سرمایہ کاروں سے ملاقات کرانے کا مطالبہ کرنے پہنچے تو دونوں فریقوں کے درمیان تلخ کلامی ہوگئی۔ اس دوران محسن خان مبینہ طور پر انہیں دفتر کے اندر لے گئے اور تشدد کا نشانہ بنایا، جبکہ ان کے ساتھ موجود باؤنسرز نے بھی مارپیٹ کی۔

پولیس نے شکایت کی بنیاد پر بھارتیہ نیائے سنہتا (BNS) کی مختلف دفعات کے تحت مقدمہ درج کرکے تحقیقات شروع کر دی ہیں۔