مغربی بنگال انتخابات: بی جے پی کی حکومت بنی تو بنگال میں یکساں سول کوڈ نافذ ہوگا، امیت شاہ

نئی دہلی 13 اپریل:(اردودنیا.اِن/ایجنسیز) مغربی بنگال میں ہونے والے اسمبلی انتخابات سے قبل سیاسی ماحول گرم ہوتا جا رہا ہے۔ مرکزی وزیر داخلہ امیت نے پیر کے روز ایک انتخابی ریلی میں ترنمول کانگریس حکومت پر سخت طنز کرتے ہوئے کئی بڑے وعدے کیے۔

بیر بھوم ضلع کے میوریشور میں منعقدہ ریلی سے خطاب کرتے ہوئے امیت نے کہا کہ بھارتیہ جنتا پارٹی اقتدار میں آنے کے بعد ریاست میں یکساں سول کوڈ نافذ کرے گی۔ انہوں نے کہا کہ بنگال میں قانون سب کے لیے برابر ہونا چاہیے اورکسی کو بھی ایک سے زیادہ شادی کرنے کی اجازت نہیں ہونی چاہیے۔۔

امیت نے کہا کہ بی جے پی کے منشور میں واضح طور پر یہ وعدہ شامل ہے کہ اقتدار میں آنے کے بعد یکساں قانون نافذ کیا جائے گا۔ انہوں نے عوام سے اپیل کی کہ وہ 5 تاریخ کو بی جے پی کو ووٹ دے کر حکومت بنانے کا موقع دیں تاکہ یہ وعدے پورے کیے جا سکیں۔

انہوں نے ریاستی حکومت پر بدعنوانی کے سنگین الزامات بھی عائد کیے اور کہا کہ مختلف شعبوں میں کرپشن کی وجہ سے عوام مرکزی حکومت کی فلاحی اسکیموں کا پورا فائدہ نہیں اٹھا پا رہے ہیں۔ بی جے پی حکومت اس نظام کو بدل دے گی اور عوام تک براہ راست فائدہ پہنچائے گی۔

خواتین کی حفاظت کا ذکر کرتے ہوئے امیت نے یقین دلایا کہ بی جے پی حکومت میں خواتین دن رات بلا خوف و خطر کام کر سکیں گی۔

ریلی کے دوران امیت نے کہا کہ مغربی بنگال کے عوام اپنے ووٹ کے ذریعے تشدد اور بدامنی کا جواب دیں گے اور ریاست میں "ڈبل انجن” کی حکومت قائم کریں گے۔ انہوں نے الزام لگایا کہ گزشتہ 15 برسوں میں ترنمول کانگریس نے بنگال کو بموں اور گولیوں کے گودام میں تبدیل کر دیا ہے۔

انہوں نے وزیر اعلیٰ ممتا بنرجی پر بھی تنقید کرتے ہوئے کہا کہ وہ اکثریتی طبقے کو ڈرانے کی کوشش کر رہی ہیں۔ امیت نے کہا کہ یہ انتخابات دراندازوں کو نکالنے اور ریاست میں امن و امان بحال کرنے کے لیے انتہائی اہم ہیں۔

امیت نے مزید الزام لگایا کہ ترنمول کانگریس کے دور حکومت میں مرشد آباد میں فسادات ہوئے، رام نومی کے جلوسوں پر حملے کیے گئے اور بعض مقامات پر سرسوتی پوجا کی اجازت نہیں دی گئی۔

آخر میں انہوں نے کہا کہ انتخابی دن تشدد پھیلانے والوں کے خلاف سخت کارروائی کی جائے گی اور قانون کی حکمرانی قائم کی جائے گی۔